აჭარის მთავრობის თავმჯდომარეს თანამდებობა დაატოვებინეს. სულხან თამაზაშვილის გადადგომის შესახებ საზოგადოებას ბრიფინგის მეშვეობით ირაკლი კობახიძემ აცნობა.
პრემიერის თქმით, თამაზაშვილი შსს მინისტრად დაინიშნება.
რით დაამახსოვრა აჭარას თავი სულხან თამაზაშვილმა? „აჭარა თაიმსის“ არქივში ინახება არაერთი მასალა, რომელიც მისი მმართველობის სტილსა და მიდგომებს ასახავს.
ის აჭარის მთავრობის თავმჯდომარედ დახურულ კარს მიღმა აირჩიეს. პრეცედენტული გადაწყვეტილებით, როცა უმაღლესი საბჭოს სხდომა მედიისთვის სრულად დაიხურა და მმართველმა გუნდმა კანდიდატს ერთხმად დაუჭირა მხარი.
თანამდებობაზე დანიშვნის პერიოდში სულხან თამაზაშვილს მძიმე ბრალდებებიც წაუყენეს. საუბარია ზურა ელიბაშვილის გარდაცვალების საქმეზე. გარდაცვლილის ნათესავის თქმით, შემთხვევის დღეს ელიბაშვილს საპატრულო პოლიციის ეკიპაჟი მისდევდა. მიუხედავად იმისა, რომ დევნაში მონაწილე პირები იდენტიფიცირებულნი არიან, გამოძიებას ამ დრომდე შედეგი არ მოუტანია. საქმე უკვე თითქმის ცხრა წელია უშედეგოდ მიმდინარეობს, ხოლო პროცესში ერთ-ერთ ფიგურანტად სულხან თამაზაშვილიც სახელდება.
მას შემდეგ, დახურული ფორმატი მისი მუშაობის სტილის ნაწილი გახდა. მთავრობის სხდომები არ იყო საჯარო, ხოლო დამოუკიდებელ მედიასთან კომუნიკაცია პრაქტიკულად არ ხდებოდა. ოფიციალური ღონისძიებებიც წინასწარი ანონსის გარეშე იმართებოდა.
თამაზაშვილმა პირველი ოფიციალური შეხვედრა გამართა სხალთელ ეპისკოპოსთან, რომელიც პრორუსული განცხადებებითა და სიძულვილის ენით არის გამორჩეული.
მის სახელს უკავშირდება უკანონო მშენებლობის ფაქტიც. „საერთაშორისო გამჭვირვალობა საქართველოს“ კვლევის თანახმად, მისი ოჯახის წევრებმა ქობულეთის მუნიციპალიტეტში სახელმწიფოს კუთვნილი მიწის ნაკვეთი უკანონოდ დაიკავეს და მასზე საცხოვრებელი სახლი ააშენეს.
კრიტიკის საგანი გახდა მისი დამოკიდებულებაც მოქალაქეების მიმართ. თამაზაშვილი არ ხვდებოდა პროტესტში ჩართულ პირებს, მათ შორის უსახლკარო მარტოხელა დედებს. ერთ-ერთი ასეთი შემთხვევა ახალი წლის ღამეს მოხდა, როდესაც მან პროტესტის მონაწილეები უყურადღებოდ დატოვა და ახალი წელი დაცვის კორდონის მიღმა მყოფ მიულოცა.
მისი ხელმძღვანელობის პერიოდში აჭარაში განხორციელდა მასშტაბური საკადრო ცვლილებები. საზოგადოებაში გაჩნდა მოსაზრება, რომ თანამდებობებიდან ძირითადად ის პირები გათავისუფლდნენ, რომლებიც ყოფილ თავმჯდომარესთან, თორნიკე რიჟვაძესთან ასოცირდებოდნენ.
თამაზაშვილს კარიერული გამოცდილება სამართალდამცავ სისტემაში ჰქონდა. ის მუშაობდა შინაგან საქმეთა სამინისტროში სხვადასხვა მაღალ პოზიციაზე, მათ შორის, ბოლო ოთხი წლის განმავლობაში იკავებდა თბილისის პოლიციის დეპარტამენტის დირექტორის პოსტს.
სულხან თამაზაშვილი ასევე, მოხვდა დიდი ბრიტანეთის მთავრობის მიერ დაწესებული სანქციების სიაში. გადაწყვეტილების მიზეზად დასახელდა პროევროპული საპროტესტო აქციების ძალადობრივი დარბევა.
