საქართველოს სტატისტიკის ეროვნული სამსახურის მონაცემებით, 2025 წელს ქვეყანაში უმუშევრობის დონე წინა წელთან შედარებით უცვლელი დარჩა და 13.9 პროცენტი შეადგინა.
ამავე პერიოდში სამუშაო ძალის მონაწილეობის დონე 0.3 პროცენტული პუნქტით შემცირდა და 54.5 პროცენტს გაუტოლდა, ხოლო დასაქმების დონე 0.2 პროცენტული პუნქტით შემცირდა და 46.9 პროცენტი შეადგინა.
განსაკუთრებული ცვლილებები ფიქსირდება ქალაქის ტიპის დასახლებებში, მათ შორის აჭარის ურბანულ სივრცეში. ქალაქებში დასაქმების დონე 1.2 პროცენტული პუნქტით შემცირდა, ხოლო უმუშევრობა 1.3 პროცენტული პუნქტით გაიზარდა. სოფლის ტიპის დასახლებებში კი საპირისპირო ტენდენციაა – დასაქმება 1.1 პროცენტული პუნქტით გაიზარდა, ხოლო უმუშევრობა 2.1 პროცენტული პუნქტით შემცირდა.
რეგიონების მიხედვით, უმუშევრობის ყველაზე მკვეთრი შემცირება რაჭა-ლეჩხუმისა და ქვემო სვანეთის, ქვემო ქართლისა და გურიის რეგიონებში დაფიქსირდა. მონაცემების მიხედვით, დაქირავებულთა წილი დასაქმებულებში 69.3 პროცენტს შეადგენს, რაც წინა წელთან შედარებით 0.8 პროცენტული პუნქტით მეტია.
გენდერულ ჭრილში სამუშაო ძალაში მონაწილეობის დონე ქალებში 44.2 პროცენტია, ხოლო კაცებში 66.3 პროცენტი. უმუშევრობის მაჩვენებელი ქალებში მცირედით გაიზარდა, ხოლო კაცებში შემცირდა. ასაკობრივი ჯგუფების მიხედვით, ყველაზე მაღალი უმუშევრობა 15-19 წლის ახალგაზრდებში ფიქსირდება (39.0%), ყველაზე დაბალი კი 65 წლის და უფროს მოსახლეობაში (3.5%).
საქსტატის შეფასებით, მიუხედავად ქვეყნის მასშტაბით სტაბილური სურათისა, ქალაქებში განსაკუთრებით აჭარის ურბანულ ნაწილში შრომის ბაზარზე გაუარესების ტენდენცია შეინიშნება, მაშინ როცა სოფლებში შედარებითი გაუმჯობესებაა დაფიქსირებული.
აქვე დაგაინტერესებთ ⇓
როგორ იზრდება აჭარაში მოსახლეობის რაოდენობა, როცა შობადობა იკლებს
საქსტატის მტკიცებით, წინასწარი მონაცემები, საქართველოში მოსახლეობის რიცხოვნობა 3.9 მილიონია
რუსეთის მოქალაქეები საქართველოს მოქალაქეობას ყველაზე ხშირად იღებენ – საქსტატის ახალი მონაცემები
საავადმყოფოების დატვირთვა მცირდება, მაგრამ ავადობის მაჩვენებლები მზარდია – სტატისტიკა
ქორწინებისა და განქორწინების სტატისტიკა აჭარაში
