რუსეთის ხელისუფლება აზოვის ზღვის გავლით საერთაშორისო საკრუიზო მარშრუტების აღდგენის შესაძლებლობას განიხილავს. შესაბამისი ინფორმაცია რუსეთის ფედერაციის მთავრობის დოკუმენტშია მოცემული, რომელსაც რუსული სახელმწიფო სააგენტო Ria Novosti ავრცელებს.
დოკუმენტის მიხედვით, საუბარია აზოვის ზღვაზე უცხო ქვეყნების მიმართულებით საკრუიზო მიმოსვლის შესაძლო განახლებაზე. ოკუპანტი ქვეყნის ხელისუფლება აღნიშნავს, რომ წარსულში არსებობდა საკრუიზო მარშრუტი მარიუპოლსა და ბათუმს შორის და შესაბამისი სამგზავრო ნავმისადგომის აღდგენის ან ახალი ინფრასტრუქტურის მშენებლობის შემთხვევაში, აღნიშნული მარშრუტის აღდგენა შესაძლებელია.
ამავე დოკუმენტებში მითითებულია, რომ საერთაშორისო კრუიზებისთვის შესაძლოა გამოყენებული იყოს გემი „მუსტაი კარიმი“.
Ria Novosti-ის ინფორმაციით, აზოვის ზღვის აუზში რვა პორტი მდებარეობს: მარიუპოლი, იეისკი, კავკაზი, ტემრიუკი, ბერდიანსკი, აზოვი, დონის როსტოვი და ტაგანროგი. თუმცა სამთავრობო დოკუმენტებში დაზუსტებულია, რომ სამგზავრო საკრუიზო გემების მისაღებად საჭირო სპეციალიზებული ნავმისადგომი ამ ეტაპზე მხოლოდ ტაგანროგის პორტს გააჩნია. იეისკისა და მარიუპოლის პორტებმა კი, დოკუმენტის თანახმად, მსგავსი გემების მიღების შესაძლებლობა დაკარგეს.
