ბათუმის საქალაქო სასამართლომ აჭარის კულტურის სამინისტროს დავის დასრულებამდე მოსწავლე ახალგაზრდობის სასახლის დირექტორის თანამდებობაზე სხვა პირის დანიშვნა აუკრძალა.
საქმე შეეხება თამარ მესხიძეს, რომელიც აჭარის მოსწავლე ახალგაზრდობის სასახლეს 2013 წლის 2 აპრილიდან 2026 წლის 2 მარტამდე ხელმძღვანელობდა. მიუხედავად ხანგრძლივი მუშაობისა, იგი 2026 წლის 27 თებერვალს აჭარის კულტურის მინისტრის გადაწყვეტილებით, მოვალეობების არაჯეროვანი შესრულების საფუძვლით თანამდებობიდან გაათავისუფლეს.
გათავისუფლების შემდეგ დირექტორის მოვალეობის შემსრულებლად მისი მოადგილე დაინიშნა.
განთავისუფლებულმა დირექტორმა დახმარებისთვის უფლებათა დაცვის საერთაშორისო ცენტრის (ICFRP) „მართლმსაჯულების სამსახურს“ მიმართა. ორგანიზაციამ ბათუმის საქალაქო სასამართლოში „გადაუდებელი უზრუნველყოფის ღონისძიების“ გამოყენების შუამდგომლობა შეიტანა.
სასამართლომ შუამდგომლობა დააკმაყოფილა და დავის დასრულებამდე აჭარის კულტურის სამინისტროს მოსწავლე ახალგაზრდობის სასახლის დირექტორის თანამდებობაზე სხვა პირის, გარდა მოქმედი მოვალეობის შემსრულებლისა, დანიშვნა აუკრძალა.
ორგანიზაციის შეფასებით, აღნიშნულ გადაწყვეტილებას სოციალური უფლებების დაცვის თვალსაზრისით პრეცედენტული მნიშვნელობა აქვს.
