ორგანიზაცია „რეპორტიორები საზღვრებს გარეშე“ მსოფლიოში მედიის თავისუფლების 2025 წლის ინდექსს აქვეყნებს, რომლის თანახმადაც საქართველოში მედიის თავისუფლების მდგომარეობა კვლავ გაუარესდა. ქვეყანა ინდექსში 180 ქვეყნიდან 114-ე ადგილზეა, რაც გასული წლის შედეგზე 11 პოზიციით უკან დახევას ნიშნავს (2024 წელს საქართველო 103-ე ადგილზე იყო).
RSF-ის ანგარიშის მიხედვით, საქართველოში სახელმწიფო ჩარევა მედიის თავისუფლების გაუმჯობესების მცდელობებს მნიშვნელოვნად აფერხებს. დოკუმენტში აღნიშნულია, რომ ჟურნალისტების მიმართ როგორც სიტყვიერი, ისე ფიზიკური თავდასხმები იზრდება, რაც განსაკუთრებით ეხება დამოუკიდებელ და კრიტიკულად განწყობილ მედიასაშუალებებს.
განსაკუთრებული შეშფოთება გამოთქმულია იმ კანონების მიმართ, რომლებიც „უცხოური გავლენის“ და „ოჯახური ღირებულებების“ სახელით მიიჩნევა ჟურნალისტების მარგინალიზებისა და ცენზურის ინსტრუმენტად. RSF-ის შეფასებით, ამ ტიპის კანონები ამცირებს სივრცეს სიტყვის თავისუფლებისთვის და ამძაფრებს მტრულ გარემოს მედიასთან მიმართებაში.
ანგარიშში მოყვანილია ასევე პოლიტიკურ კონტექსტში არსებული პრობლემები. აღნიშნულია, რომ 2024 წლის საკანონმდებლო არჩევნების შემდეგ ქვეყანაში რეპრესიული გარემო გაძლიერდა და ხელისუფლება ხშირად უარს ამბობს იმ მედიასთან თანამშრომლობაზე, რომელიც მას აკრიტიკებს. ამასთან, ხშირია ცენზურა, რეიდები, ცილისწამების კამპანიები და ჟურნალისტების დაშინების მცდელობები.
ორგანიზაცია ასევე ყურადღებას ამახვილებს მედიის მფლობელობაზე და მიუთითებს, რომ მიუხედავად არსებული რეგულაციებისა, რომელიც პოლიტიკურ პარტიებს მედიასაშუალებების ფლობას უკრძალავს, დიდი სატელევიზიო ქსელები ხშირად მჭიდროდ არიან დაკავშირებული პოლიტიკურ ელიტებთან და შესაბამისად, მათი სარედაქციო პოლიტიკაც მფლობელების ინტერესებს ემსახურება.
RSF-ის განცხადებით, ჟურნალისტების უსაფრთხოება საქართველოში კვლავ სერიოზული გამოწვევის წინაშე დგას. მაგალითად, 2021 წლის ივლისში ჰომოფობიური კონტრდემონსტრაციების დროს 50-ზე მეტ ჟურნალისტზე განხორციელებული თავდასხმები ხელისუფლების გულგრილობის ფონზე მოხდა, რაც ორგანიზაციის შეფასებით, მედიის თავისუფლების კუთხით უპრეცედენტო უკუსვლა იყო. დოკუმენტში ხაზგასმულია, რომ ჟურნალისტებზე თავდასხმების საქმეების გამოძიება არ არის გამჭვირვალე და დამნაშავეთა დაუსჯელობა მედიისთვის საფრთხის მთავარ წყაროდ რჩება.
