საქართველო Open Government Partnership-იდან ოფიციალურად გარიცხეს. შესაბამისი გადაწყვეტილება ორგანიზაციის მმართველმა კომიტეტმა მიიღო, მას შემდეგ რაც ქვეყანამ ვერ დააკმაყოფილა პარტნიორობაში დარჩენისთვის აუცილებელი კრიტერიუმები.
პროცესი 2024 წლის ოქტომბერში დაიწყო, როდესაც საქართველოს წევრობა დროებით შეუჩერდა. იმ პერიოდში „ქართულ ოცნებას“ მოუწოდეს, გადაედგა კონკრეტული ნაბიჯები სამოქალაქო სივრცის, გამოხატვისა და შეკრების თავისუფლების დაცვის მიმართულებით. თუმცა, ორგანიზაციის ინფორმაციით, 2026 წლის მარტის მდგომარეობით, საქართველოს მთავრობას აღნიშნული პრობლემების გადასაჭრელად გეგმა არ წარუდგენია.
OGP-ის შეფასებით, ქვეყანაში კვლავ ფიქსირდება საკანონმდებლო და ინსტიტუციური შეზღუდვები მედიისა და სამოქალაქო სექტორის საქმიანობაზე. სწორედ ამ გარემოებებმა განაპირობა გადაწყვეტილება, რომლის მიხედვითაც, საქართველოსთვის პარტნიორობაში მონაწილეობისთვის აუცილებელი პირობები აღარ არსებობს.
ორგანიზაციის აღმასრულებელი დირექტორი აცხადებს, რომ OGP ეფუძნება მთავრობისა და სამოქალაქო საზოგადოების თანამშრომლობას, რაც ამჟამად საქართველოში ვერ ხერხდება. მისივე თქმით, პირობების გაუმჯობესების შემთხვევაში, ქვეყანას მომავალში ორგანიზაციაში დაბრუნების შესაძლებლობა ექნება.
მიღებულ გადაწყვეტილებას გამოეხმაურა 5 ქართული არასამთავრობო ორგანიზაცია ერთობლივი განცხადებით.
მათი შეფასებით, OGP-იდან გარიცხვა ადასტურებს, რომ საქართველო დაშორდა იმ დემოკრატიულ სტანდარტებს, რომელთა შესრულებაზეც თავად იღებდა ვალდებულებას. განცხადებაში ასევე აღნიშნულია, რომ ქვეყანამ ამით საერთაშორისო ნდობა და დემოკრატიული განვითარების მნიშვნელოვანი შესაძლებლობები დაკარგა.
არასამთავრობო სექტორი მიუთითებს ორმაგ სტანდარტზეც. მათი განცხადებით, ერთი მხრივ, ხელისუფლება ამკაცრებს კონტროლს სამოქალაქო საზოგადოების და მედიის დაფინანსებაზე „გამჭვირვალობის“ არგუმენტით, ხოლო მეორე მხრივ, თავად ვერ აკმაყოფილებს საერთაშორისო სტანდარტებს გამჭვირვალობისა და ანგარიშვალდებულების კუთხით, რაც საბოლოოდ ორგანიზაციიდან გარიცხვით დასრულდა.
