„დინამო ბათუმმა“ ეროვნული ლიგის მერვე ტურის მატჩში „გორის დილას“ დაუპირისპირდა და შეხვედრა 1:0 დათმო. მატჩის ერთადერთი გოლი მენთეშაშვილმა მე-17 წუთზე, 11-მეტრიანიდან გაიტანა.
შეხვედრის 49-ე წუთზე „გორის დილას“ ლეგიონერი მუჰამედ კანტე სახიფათო კონტრშეტევით მიიწევდა „დინამო ბათუმის“ კარისკენ. შეტევა „ბათუმელთა“ მცველმა, კალანდარიშვილმა, თამაშის წესების დარღვევით შეაჩერა, რის გამოც პირდაპირი წითელი ბარათი მიიღო.
რვა ტურის შემდეგ, შვიდი ქულით „დინამო ბათუმი“ სატურნირო ცხრილის მე-10, ბოლო ადგილზეა. ამ ეტაპზე „თოლიების“ ანგარიშზე ერთი მოგება, ოთხი ფრე და სამი მარცხია. ეროვნული ლიგის მომდევნო შეხვედრას „დინამო ბათუმი“ 27 აპრილს გამართავს – „თოლიებს“ სტუმრად ქუთაისის „ტორპედო“ დაუპირისპირდება.
ავტორი: დიმიტრი გორგილაძე
