AJARATIMES.GE-ისთვის ცნობილი ხდება, რომ ბათუმში, ერთ დღეში, ქურდობის სამი ფაქტი დაფიქსირდა. ორი ბათუმის ბულვარის მიმდებარე ტერიტორიაზე, ხოლო ერთი მამია ვარშანიძის ქუჩაზე.
მოქალაქე გვიყვება, რომ ბათუმის ბულვარში, არდაგანის ტბის მიმდებარედ, ორმა ბიჭმა ახალგაზრდა გოგოს ჩანთა გასტაცეს. მძარცველების დაკავება გამვლელებმა სცადეს, თუმცა უშედეგოდ.
“ხალხმა დაიწყო ყვირილი, ავედენვნეთ თუმცა ვერ დავაკავეთ. ძალიან გახშირდა ქურდობის ფაქტები, განსაკუთრებით ძველი ბათუმის ტერიტორიაზე,” – ამბობს მოქალაქე “აჭარა თაიმსთან” საუბრისას.
ქურდობის მეორე ფაქტი კომპლექს “მაგნოლიაში” დაფიქსირდა. ამ შემთხვევაში უცხო ქვეყნის მოქალაქეს ველოსიპედი და მასზე დასამაგრებელი ბავშვის სავარძელი მოპარეს. დაზარალებულის თქმით, ველოსიპედი სადარბაზოში ჰყავდა გაჩერებული, თუმცა სპეციალური სამაგრით იყო დაკეტილი.
შინაგან საქმეთა სამინისტროში გვითხრეს, რომ ფაქტზე გამოძიება სსკ 177-ე, ქურდობის მუხლით მიმდინარეობს.
“აჭარა თაიმსისთვის” ასევე, ცნობილი ხდება რომ ქურდობის მესამე ფაქტი მამია ვარშანიძის ქუჩაზე მოხდა. ამ შემთხვევაში მძარცველებმა ავტომობილი გატეხეს, საიდანაც ზურგჩანთა და უცხო ქვეყნის მოქალაქის დამადასტურებელი დოკუმენტაცია მოიპარეს, ასევე, პირადი ნივთებიც. მოქალაქე გვიყვება, რომ დანაშაულის შესახებ პოლიციას აცნობა.
“ჩემთვის ძალიან მნიშვნელოვანი ნივთები და დოკუმენტაცია დაიკარგა, დაბრუნების შემთხვევაში, მზად ვარ თანხით დავასაჩუქრო მძარცველი,” – ამბობს დაზარალებული.
შინაგან საქმეთა სამინისტროში გვითხრეს, რომ ფაქტზე გამოძიება სსკ 177-ე, ქურდობის მუხლით მიმდინარეობს.
აქვე დაგაინტერესებთ: ბათუმში ავტომობილები გაქურდეს
