პარაშუტიდან ჩამოვარდნილი კაცის ჯანმრთელობის მდგომარეობა სტაბილურია და ის ბინაზე სავარაუდოდ, ხვალ გაეწერება, ამის შესახებ “აჭარა თაიმსს” ბათუმის რესპუბლიკურ საავამდყოფოში განუცხადეს.
მკურნალი ექიმის თქმით, პაციენტი კონტაქტურია და მას ყველა საჭირო სამედიცინო გამოკვლევა უკვე ჩაუტარდა.
“პაციენტი შემოიყვანეს არაადეკვატურ მდგომარეობაში, თუმცა გონზე იყო. საერთო ჯამში, სტაბილური მდგომარეობაა, ჩატარდა კვლევები, ამ ეტაპზე ტრამვული ცვლილებები არ ვლინდება. პაციენტი გონზეა და ემერჯენსის განყოფილებაში ექიმების დაკვირვების ქვეშ რჩება,” – აცხადებს მამული ხოზრევანიძე, გადაუდებელი მედიცინის ექიმი.
ინფორმაციისთვის: შემთხვევა დღის ბოლოს, დაბა მახინჯაურის სანაპიროზე მოხდა. არაბეთის მოქალაქე პარაშუტზე, კიდევ ერთ პირთან ერთად იმყოფებოდა, რომლის ჩამოვარდნის დროსაც ქალი ადგილზევე დაიღუპა. შემთხვევას წინ რამდენიმე წუთიანი ძლიერი ქარი უძღვოდა.
მომხდარ ფაქტზე შინაგან საქმეთა სამინისტრომ გამოძიება სისხლის სამართლის კოდექსის 275-ე მუხლით დაიწყო, რაც საჰაერო ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.
