ბათუმის შოთა რუსთაველის სახელმწიფო უნივერსიტეტის რექტორის არჩევნებთან დაკავშირებით ინტერესთა კონფლიქტის საკითხმა ყურადღება მიიპყრო.
ერთ-ერთი კანდიდატის, ტიტე აროშიძის, მხარდამჭერად ითვლება მისი ძმა, რომელიც თავად არის აკადემიური საბჭოს წევრი და მონაწილეობს ახალი რექტორის არჩევის პროცესში.
საკითხთან დაკავშირებით „აჭარა თაიმსმა“ ბსუ-ს მიმართა. უნივერსიტეტში განაცხადეს, რომ დებულების თანახმად,აკადემიური საბჭოს ინტერესთა კონფლიქტის შემთხვევაში აცილების ვალდებულება არ გააჩნია.
ტიტე აროშიძე, რომელიც ცნობილია, როგორც არაკონსტიტუციური უმაღლესი საბჭოს თვითგამოცხადებული დეპუტატი, საზოგადოების ნაწილის აზრით, უნივერსიტეტის მომდევნო რექტორი შესაძლოა უკვე წინასწარ განსაზღვრული იყოს. ამ ეჭვს ისიც ამყარებს, რომ აროშიძის მხარდამჭერები სოციალურ ქსელებში მას უკვე რექტორად მოიხსენიებენ.
რექტორის არჩევნებში მონაწილეობას იღებს მეორე კანდიდატი, არჩილ გუჩმანიძეც. გუჩმანიძემ სოციალურ ქსელში გაავრცელა ინფორმაცია, რომ მასზე ზეწოლა ხორციელდება კანდიდატურის მოხსნის მიზნით.
მისი თქმით, გარკვეული პირები მას უჩვეულო „რჩევებს“ აძლევენ, თუმცა ამგვარი მეთოდების მიუხედავად, იგი არჩევნებიდან საკუთარი კანდიდატურის მოხსნას არ აპირებს.
გუჩმანიძის განცხადებით, მისი მთავარი მიზანი არჩევნების სამართლიანობის უზრუნველყოფაა.
ცნობისთვის: კანდიდატების სამოქმედო გეგმის განხილვა 21 იანვარს, 14:00 საათზე, ხოლო ფარული კენჭისყრაც იმავე დღეს, 15:00 საათზე გაიმართება.
რექტორის არჩევისთვის აუცილებელია აკადემიური საბჭოს წევრების უმრავლესობის მხარდაჭერა. კანდიდატმა რექტორად დანიშვნისთვის უნდა მოიპოვოს მინიმუმ 6 ხმა.
ინფორმაციისთვის: ბსუ-ის მოქმედი რექტორის მოვალეობის შემსრულებელი მერაბ ხალვაში, ასევე, “ქართული ოცნების” დეპუტატი ტიტე აროშიძე, რუსული კანონისა და ანტიდასავლური კამპანიის მხარდამჭერები არიან.
