ხელვაჩაურის რაიონული სამმართველოს თანამშრომლებმა ჩატარებული ოპერატიულ-საგამოძიებო მოქმედებების შედეგად განსაკუთრებით დიდი ოდენობით ნარკოტიკული საშუალების — „მეთადონის“ — უკანონო შეძენა-შენახვისა და რეალიზაციის მცდელობის ბრალდებით უკრაინის მოქალაქე, 2002 წელს დაბადებული ო.ს. დააკავეს.
შსს-ს ინფორმაციით, სამართალდამცველებმა ბრალდებულის პირადი ჩხრეკისა და დროებითი საცხოვრებელი სახლის ინსპექტირებისას ამოიღეს კანფეტის ქაღალდებში დაფასოებული „მეთადონი“, რომელიც სხვადასხვა ლოკაციაზე სარეალიზაციოდ იყო განთავსებული. გარდა ამისა, ნივთმტკიცებად ამოიღეს ელექტრონული სასწორები და ნარკოტიკული საშუალებების დაფასოებისთვის საჭირო მასალები.
გამოძიება სისხლის სამართლის კოდექსის 260-ე მუხლის მესამე ნაწილით და 19-260-ე მუხლის მესამე ნაწილით მიმდინარეობს, რაც განსაკუთრებით დიდი ოდენობით ნარკოტიკული საშუალების უკანონო შეძენა-შენახვასა და გასაღების მცდელობას გულისხმობს. დანაშაული 20 წლამდე ან უვადო თავისუფლების აღკვეთას ითვალისწინებს. შინაგან საქმეთა სამინისტრო აგრძელებს ინტენსიურ ოპერატიულ-საგამოძიებო ღონისძიებებს ნარკოტიკების უკანონო ბრუნვის წინააღმდეგ.
