10 მომხრე და არცერთი წინააღმდეგი – ბათუმის შოთა რუსთაველის სახელმწიფო უნივერსიტეტის აკადემიურმა საბჭომ რექტორად სამთავრობო კანდიდატი, ტიტე აროშიძე აირჩია. მას მხარი დაუჭირა ძმამ, პაატა აროშიძემ, რომელიც ამავე საბჭოს წევრია.
რექტორობის კანდიდატებს, მათ შორის ტიტე აროშიძესა და არჩილ გუჩმანიძეს, აკადემიურმა საბჭომ დღეს მოუსმინა. საბჭოს წევრებს აროშიძესთან არ ჰქონიათ საგნობრივი შეკითხვები ან მოსაზრებები, რაც, როგორც ჩანს, აისახა მათ საბოლოო გადაწყვეტილებაში. აღსანიშნავია ისიც, რომ საბჭოს წევრებმა კანდიდატების სამოქმედო გეგმების მოსმენის შემდეგ ტაში მხოლოდ ტიტე აროშიძეს დაუკრეს.
“ბსუ დღეს დასრულდა,” – ასე შეაფასა არჩევნების შედეგები არჩილ გუჩმანიძემ.
არჩევნების პარალელურად, სტუდენტებმა ტიტე აროშიძის კანდიდატურის მიმართ უკმაყოფილებას აფიქსირებდნენ. ისინი პროტესტს კარებზე ხელის ბრახუნით და შეძახილებით გამოხატავდნენ. მათი შეფასებით, ტიტე აროშიძე უნივერსიტეტში რეპრესიების გატარებას აპირებს.
https://www.facebook.com/ajaratimes/videos/542040238861183/
ინფორმაციისთვის: ბსუ-ის ყოფილი რექტორის მოვალეობის შემსრულებელი მერაბ ხალვაში, ასევე, “ქართული ოცნების” დეპუტატი ტიტე აროშიძე, რუსული კანონისა და ანტიდასავლური კამპანიის მხარდამჭერები არიან.
