„ქართული ოცნების“ მთავრობის დადგენილებით, 2026 წლის 5 და 6 იანვარი უქმე დღეებად გამოცხადდა. შესაბამისი დოკუმენტი საკანონმდებლო მაცნეს ვებგვერდზე გამოქვეყნდა.
დადგენილების თანახმად, ადმინისტრაციული ორგანოები უფლებამოსილი არიან განსაზღვრონ ის სამსახურები და თანამშრომლები, რომლებზეც აღნიშნული გადაწყვეტილება არ გავრცელდება, იმ შემთხვევაში, თუ მათი ფუნქციების შესრულება აუცილებელია სახელმწიფო ხელისუფლების განხორციელებისა და საზოგადოების ნორმალური ფუნქციონირებისთვის.
დოკუმენტში ასევე მითითებულია, რომ დადგენილება არ ვრცელდება საქართველოს ეროვნული ბანკის ზედამხედველობას დაქვემდებარებული პირების წინაშე შესასრულებელ ფინანსურ ვალდებულებებზე.
ამასთან, უქმე დღეების გამოცხადება არ შეეხება „სახელმწიფო შესყიდვების შესახებ“ საქართველოს კანონით გათვალისწინებულ სახელმწიფო შესყიდვებთან დაკავშირებულ საქმიანობას, მათ შორის კანონში განსაზღვრული გამონაკლისების ფარგლებში განხორციელებულ შესყიდვებსა და სახელმწიფო შესყიდვებთან დაკავშირებულ დავების განხილვის საბჭოს საქმიანობას.
დადგენილებას ხელს აწერს „ქართული ოცნების“ პრემიერ-მინისტრი ირაკლი კობახიძე.
