„დინამო ბათუმის“ ახალი მფლობელი ბიზნესმენი თემურ მიქელაძე გახდება. აჭარის მთავრობასა და ბიზნესმენს შორის შეთანხმება მიღწეულია და კლუბის ახალი მფლობელისთვის გადაცემა უახლოეს დღეებში უნდა განხორციელდეს.
Geo Team-ის ცნობით, მიქელაძესთან ერთად კლუბს ნიკა ჯღარკავა შეუერთდება და გენერალური დირექტორის პოზიციას დაიკავებს. ჯღარკავა 2011–2014 წლებში „დინამო თბილისის“ დირექტორი იყო, ხოლო 2015–2025 წლებში საქართველოს ფეხბურთის ფედერაციის ვიცე-პრეზიდენტის თანამდებობას იკავებდა.
„დინამო ბათუმი“ 10 დეკემბრის შემდეგ აჭარის ავტონომიური რესპუბლიკის მფლობელობაში (კლუბის 100 პროცენტი) დაბრუნდა, რის შედეგადაც შეწყდა ხელშეკრულება შპს „ლამინთან“.
შპს „ლამინი“, რომელიც არჩილ ბერიძის მფლობელობაშია, კლუბს 2019 წლიდან მართავდა. ამ პერიოდში „თოლიები“ ორჯერ გახდნენ ეროვნული ლიგის ჩემპიონები – 2021 და 2023 წლებში. თუმცა ბოლო პერიოდში „დინამო ბათუმს“ ფინანსური პრობლემები და დავალიანებები შეექმნა. როგორც ბათუმის ფან-კლუბი „შავი ზღვის პირატები“ აცხადებდა, კლუბი ფინანსურ კრიზისში იყო და მას შესაძლოა პროფესიული სტატუსი ჩამოერთმია და მეოთხე ლიგაში დაქვეითებულიყო.
„პირატებმა“ აღნიშნულ საკითხზე რამდენიმე თვის წინ განცხადება გაავრცელეს, სადაც აჭარის მთავრობას კლუბის გადარჩენაში დახმარებას სთხოვდნენ.
ავტორი: დიმიტრი გორგილაძე
