დაბა ჩაქვში, ლაო ჯინ ჯაოს სააგარაკე სახლის რეაბილიტაციის პროექტის შესყიდვაზე ტენდერი გამოცხადდა, ამის შესახებ ინფორმაციას აჭარის კულტურული მემკვიდრეობის დაცვის სააგენტო ავრცელებს.
სააგენტოს ცნობით, პროექტით გათვალისწინებულია შენობის სრული რეაბილიტაცია, ასევე, მიმდებარედ მოეწყობა საპარკინგე და სხვა სახის ღია სივრცეები, შენობის ფასადსა და ინტერიერში ჩატარდება სარეაბილიტაციო სამუშაოები.
“პარალელურად სააგენტო იწყებს მუშაობას შენობის ინტერიერის დიზაინზე. იგი ითვალისწინებს თანამედროვე ციფრული ტექნოლოგიების გამოყენებით საგამოფენო სივრცის მოწყობას, სადაც შესაძლებელი იქნება ქართული ჩაის ისტორიის სრული სურათის გაცნობა, ჩაის დეგუსტაცია, სხვადასხვა კულტურულ-საგანმანათლებლო ღონისძიებების ორგანიზება და ა.შ. შედეგად კულტურული მემკვიდრეობის ძეგლის ბაზაზე ქართული საზოგადოება მიიღებს კიდევ ერთ ახალ, საინტერესო და მიმზიდველ კულტურულ ცენტრს,” – წერია სააგენტოს მიერ გავრცელებულ ინფორმაციაში.
ინფორმაციისთვის: XIX საუკუნის ბოლოს აშენებული ლაო ჯინ ჯაოს სააგარაკე სახლი საინტერესო გეგმარებითა და დახვეწილი ფორმებით ხასიათდება. იგი ამ დროის ნაგებობათა შორის ერთ-ერთი გამორჩეულია. ამ სახლთან ჩაქვისა და ზოგადად იმ დროის ბათუმის ეკონომიკური განვითარების საინტერესო ისტორიები და ბიოგრაფიებია დაკავშირებული.
1893 წელს საქართველოში ლაო ჯინ ჯაო სამი წლით მოიწვიეს, თუმცა მან აქ 30 წელი იცხოვრა და ქართული ჩაის განვითარების ისტორიაში მნიშვნელოვანი როლი შეასრულა.
