„ქართული ოცნების“ გენერალურმა პროკურორმა გიორგი გვარაკიძემ ბრიფინგზე განაცხადა, რომ ქვეყნის მასშტაბით ჩატარდა მასშტაბური ოპერაცია, რომლის ფარგლებშიც ჩხრეკა განხორციელდა ყოფილი პრემიერ-მინისტრის ირაკლი ღარიბაშვილის, სახელმწიფო უსაფრთხოების სამსახურის ყოფილი უფროსის გრიგოლ ლილუაშვილის, ყოფილი მთავარი პროკურორის ოთარ ფარცხალაძის და მათთან დაკავშირებული კიდევ რვა პირის საცხოვრებელ სახლებში.
გვარაკიძის თქმით, ჩხრეკის შედეგად ამოღებულია სხვადასხვა ელექტრონული მოწყობილობა, დოკუმენტაცია და დიდი ოდენობით ფულადი თანხა.
„განსაკუთრებით მაღალი საზოგადოებრივი ინტერესიდან და საქმეების მნიშვნელობიდან გამომდინარე, მსურს საზოგადოებას მივაწოდო შემდეგი ინფორმაცია. დღეს დილის 10:00 საათიდან, ქვეყნის მასშტაბით, ერთდროულად 22 ლოკაციაზე ჩატარდა მასშტაბური ღონისძიება. ერთობლივი ოპერაციის ფარგლებში განხორციელდა ირაკლი ღარიბაშვილის, გრიგოლ ლილუაშვილის, ოთარ ფარცხალაძის და მათთან დაკავშირებული პირების საცხოვრებელი ბინების, სახლების და პირადი ჩხრეკები. ამოღებულია სხვადასხვა ელექტრონული მოწყობილობა, დოკუმენტაცია და დიდი ოდენობით ფულადი თანხა“, – აღნიშნა გიორგი გვარაკიძემ.
მისივე თქმით, გამოძიება მიმდინარეობს სახელმწიფო უსაფრთხოების სამსახურის ანტიკორუფციულ და სახელმწიფო უსაფრთხოების დეპარტამენტებთან თანამშრომლობით.
„ხსენებულ საქმეზე აქტიურად ტარდება საგამოძიებო, საპროცესო და ოპერატიულ-სამძებრო ღონისძიებები. გამოძიების მიმდინარეობის და შედეგების შესახებ საზოგადოებას პერიოდულად დამატებით მივაწვდით ინფორმაციას“, – დასძინა გენერალურმა პროკურორმა.
ოფიციალური უწყების ინფორმაციით, საქმე ეხება სხვადასხვა სისხლის სამართლის საქმეებს, რომელთა დეტალებზე პროკურატურა ამ ეტაპზე არ საუბრობს.
