შსს ცნობით, აჭარის პოლიციის დეპარტამენტის თანამშრომლებმა ორი პირი 1992 წელს დაბადებული ა.ფ. და 1995 წელს დაბადებული რ.გ. დიდი ოდენობით, ჯგუფურად ჩადენილი თაღლითობის ბრალდებით დააკავეს.
მათ ბრალად ედებათ 1996 წელს დაბადებული ნ.მ.-ს მოტყუებით მნიშვნელოვანი თანხის გამოღება. გამოძიების ინფორმაციით, დაზარალებული ავტომობილის შეძენით იყო დაინტერესებული, რის გამოც ბრალდებულებს საზღვარგარეთიდან მანქანის ჩამოყვანაში დახმარება სთხოვა. სწორედ ამ მოტივით, მათ ნ.მ.-სგან თაღლითურად გამოართვეს და მიითვისეს დაახლოებით 50 000 აშშ დოლარის ოდენობის თანხა.
სამართალდამცველებმა ბრალდებულები მოსამართლის განჩინების საფუძველზე დააკავეს. საქმის გამოძიება სისხლის სამართლის კოდექსის 180-ე მუხლის მე-2 და მე-3 ნაწილებით გრძელდება, რაც ჯგუფურად ჩადენილ თაღლითობას გულისხმობს და 9 წლამდე თავისუფლების აღკვეთას ითვალისწინებს.
