ახალი წლის მოახლოებასთან ერთად გარემოს დაცვისა და სოფლის მეურნეობის სამინისტროს შესაბამისი სამსახურები წიწვოვანი მცენარეების მოპოვებასა და ტრანსპორტირებაზე კონტროლს ამკაცრებენ. ამის შესახებ ინფორმაციას ეროვნული სატყეო სააგენტო ავრცელებს.
სააგენტო მოსახლეობას მოუწოდებს, ახალი წლის დღესასწაულზე ხელოვნური ნაძვის ხეები გამოიყენონ და თავი შეიკავონ ბუნებაში წიწვოვანი მცენარეების დაზიანებისა და განადგურებისგან.
ეროვნული სატყეო სააგენტოს უფროსის, კახა ცერცვაძის განცხადებით, წიწვოვანი მცენარეების უკანონოდ მოპოვების, ტრანსპორტირებისა და რეალიზაციის წესის დარღვევის შემთხვევაში, პირველ ჯერზე ჯარიმა 2 000 ლარით განისაზღვრება, განმეორების შემთხვევაში კი სისხლის სამართლებრივი პასუხისმგებლობა დგება. პარალელურად დაითვლება გარემოსთვის მიყენებული ზიანიც.
მისივე თქმით, თუ გარემოსთვის მიყენებული ზიანის ოდენობა 1 000 ლარს აჭარბებს, პირის მიმართ სისხლის სამართლის საქმე აღიძვრება, რაც ჯარიმას ან თავისუფლების აღკვეთას 1-დან 3 წლამდე ვადით ითვალისწინებს. დიდი ოდენობით წიწვოვანი მცენარეების უკანონო მოპოვების შემთხვევაში, როცა ზიანი 3 000 ლარს აღემატება, სასჯელი 5-დან 7 წლამდე თავისუფლების აღკვეთას გულისხმობს.
ეროვნული სატყეო სააგენტოს ინფორმაციით, წიწვოვანი ხე-მცენარეების კანონიერად მოპოვება შესაძლებელია სანერგეებში, პლანტაციებში და საკარმიდამო ნაკვეთებში. ამასთან, კანონიერად მოპოვებული ხე-მცენარეების რეალიზაციისას სავალდებულოა შესაბამისი დოკუმენტის წარმოდგენა, რომელიც ხე-მცენარის კანონიერ ფლობას ადასტურებს.
თუ წიწვოვანი მცენარე მოპოვებულია კერძო საკუთრებაში არსებულ მიწის ნაკვეთზე ან ხელოვნურად გაშენებულ სანერგეში, მისი ტრანსპორტირებისათვის აუცილებელია ადგილწარმოშობის ცნობა, რომელსაც ადგილობრივი მუნიციპალიტეტის მერია გასცემს.
