შინაგან საქმეთა სამინისტროს განცხადებით, ლევან ჯანგველაძის მკვლელობის ორგანიზებაში ბრალდებულია ოთარ რომანოვ-ფარცხალაძე. ამის შესახებ ბრიფინგზე შს მინისტრის მოადგილემ, ალექსანდრე დარახველიძემ განაცხადა.
მისივე ინფორმაციით, პროკურატურამ უკვე გამოიტანა დადგენილება, რომლის მიხედვითაც ოთარ რომანოვ-ფარცხალაძე ბრალდებულის სახით მიეცემა პასუხისგებაში. დარახველიძის განმარტებით, გამოძიებით დადგინდა, რომ ფარცხალაძესა და მის ნდობით აღჭურვილ პირებს – ძმებ დავით და გიორგი მიქაძეებს – ლევან ჯანგველაძესთან ბიზნესსაქმიანობასთან დაკავშირებული უთანხმოება და ხანგრძლივი დაპირისპირება ჰქონდათ.
შსს-ის მტკიცებით, სწორედ აღნიშნული კონფლიქტის ნიადაგზე დაიგეგმა ლევან ჯანგველაძის შეკვეთილი მკვლელობა, რომლის ორგანიზებას, როგორც დანაშაულებრივი ჯგუფის ლიდერი, ოთარ რომანოვ-ფარცხალაძე ხელმძღვანელობდა. მისი დავალებით, ძმებმა მიქაძეებმა დაუკავშირდნენ მათ ნდობით აღჭურვილ პირს, გიორგი ჯოხაძეს, რომელმაც მკვლელობის გეგმა გაიზიარა. შემსრულებლის როლში კი, გამოძიების ინფორმაციით, მოძიებულ იქნა გიორგი ჯოხაძის დაცვის ყოფილი თანამშრომელი – გელა უძილაური.
გამოძიების მასალების მიხედვით, დანაშაულებრივმა ჯგუფმა წინასწარ მოიპოვა ინფორმაცია ლევან ჯანგველაძის საქართველოში ჩამოსვლის დროისა და გადაადგილების მარშრუტის შესახებ. 2025 წლის 14 მარტს, თბილისში, ჭავჭავაძის გამზირზე, გელა უძილაურმა ლევან ჯანგველაძე ცეცხლსასროლი იარაღით მოკლა, ხოლო მის თანმხლებ პირს სხეულის დაზიანება მიაყენა.
შსს-ში აცხადებენ, რომ საქმეზე ჩატარებულია ასეულობით საგამოძიებო და საპროცესო მოქმედება, ათეულობით ექსპერტიზა, გამოკითხულია მრავალი მოწმე და ამოღებულია არაერთი ნივთიერი მტკიცებულება. უწყების შეფასებით, მოპოვებულია უტყუარი მტკიცებულებები როგორც დანაშაულებრივი ჯგუფის ხელმძღვანელის, ისე მისი წევრების წინააღმდეგ.
აღნიშნულ საქმეზე მკვლელობის უშუალო შემსრულებელი, გელა უძილაური, დანაშაულიდან მალევე დააკავეს. მიმდინარე წლის 24 ოქტომბერს სასამართლომ მას გამამტყუნებელი განაჩენი გამოუტანა და უვადო თავისუფლების აღკვეთა მიუსაჯა. ამ ეტაპზე დაკავებულები არიან გიორგი მიქაძე, მამუკა ბაღდავაძე და გიორგი კაჭკაჭაშვილი. დავით მიქაძისა და გიორგი ჯოხაძის მიმართ გამოცხადებულია ძებნა. ასევე დაკავებულია სანდრო წივწივაძე, რომლის სახელზეც წარსულში რეგისტრირებული იყო მკვლელობის იარაღი.
თბილისის საქალაქო სასამართლოში ბრალდებულთა ნაწილის მიმართ საქმის არსებითი განხილვა უკვე მიმდინარეობს. რაც შეეხება ოთარ რომანოვ-ფარცხალაძეს, პროკურატურის დადგენილებით, მას ბრალად ედება შეკვეთით და ანგარებით განზრახ მკვლელობის ორგანიზება, რაც საქართველოს სისხლის სამართლის კოდექსის 25/109-ე მუხლით ისჯება და 16-დან 20 წლამდე ან უვადო თავისუფლების აღკვეთას ითვალისწინებს.
ბრალდების მხარე სასამართლოს კანონით დადგენილ ვადაში მიმართავს შუამდგომლობით, ფარცხალაძის მიმართ აღკვეთის ღონისძიების სახით პატიმრობა შეეფარდოს. ამასთანავე, მის მიმართ გამოცხადდება საერთაშორისო ძებნა.
