საქართველოს საზღვაო ტრანსპორტის სააგენტოს ინფორმაციით, 2026 წლის 1 ივლისიდან შიდა სახმელეთო წყლებში ნაოსნობაში ჩართული ძრავიანი მცურავი საშუალებების რეგისტრაცია და მართვის სერტიფიკატის ფლობა სავალდებულო ხდება.
ახალი რეგულაციები გავრცელდება ტბებზე, მდინარეებსა და წყალსაცავებზე მოძრავ კატარღებზე, იახტებზე, მოტონავებზე, ჰიდროციკლებზე, კატამარანებზე, სამგზავრო პლატფორმებსა და კანონმდებლობით განსაზღვრულ სხვა მცურავ საშუალებებზე.
სააგენტოს განმარტებით, ცვლილების მიზანია ნაოსნობის უსაფრთხოების სტანდარტების გაუმჯობესება, მგზავრთა უსაფრთხოების უზრუნველყოფა და სხვადასხვა შემთხვევის პრევენცია.
მონაცემების მიხედვით, 2020-2026 წლებში საქართველოს მდინარეებზე, ტბებსა და წყალსაცავებზე სხვადასხვა მცურავი საშუალების მონაწილეობით 80 ინციდენტი დაფიქსირდა.
რეგისტრაციის პროცესს საქართველოს ეკონომიკისა და მდგრადი განვითარების სამინისტროს სსიპ საზღვაო ტრანსპორტის სააგენტო უზრუნველყოფს. რეგისტრაციამდე მცურავმა საშუალებამ ტექნიკური ინსპექტირება სააგენტოს მიერ აღიარებულ ზედამხედველობის განმახორციელებელ ორგანიზაციაში უნდა გაიაროს.
ამასთან, შიდა სახმელეთო წყლებში ძრავიანი მცურავი საშუალების სამართავად აუცილებელი გახდება მართვის სერტიფიკატის ფლობა. სერტიფიკატი გაიცემა 5 წლის ვადით, 18 წელს მიღწეულ ქმედუნარიან პირზე, რომელიც სააგენტოს მიერ აღიარებულ საზღვაო-საწვრთნელ დაწესებულებაში გადამზადების პროგრამას წარმატებით დაასრულებს.
ამ ეტაპზე შესაბამისი პროგრამა მხოლოდ ბათუმის სახელმწიფო საზღვაო აკადემიის საზღვაო-საწვრთნელ ცენტრს აქვს აღიარებული.
სააგენტოს ინფორმაციით, აღნიშნული ტრანსპორტის მფლობელებისთვის გარდამავალი პერიოდი 2025 წლის 1 აპრილიდან მოქმედებს. ამ დროისთვის შიდა წყლების გემების რეესტრში 16 მცურავი საშუალებაა რეგისტრირებული, ხოლო მართვის სერტიფიკატი უკვე 38 ფიზიკურმა პირმა მიიღო.
ახალი რეგულაციები არ გავრცელდება კაიაკებზე, პირადი დანიშნულებით გამოყენებულ მცურავ საშუალებებსა და 3 მეტრზე ნაკლები სიგრძის, ძრავის არმქონე მცურავ საშუალებებზე.
სააგენტო განმარტავს, რომ ნებაყოფლობითი რეგისტრაციის პერიოდის დასრულების შემდეგ, 2026 წლის 1 ივლისიდან რეგულაციების დარღვევა ადმინისტრაციულ პასუხისმგებლობასა და დაჯარიმებას გამოიწვევს.
