შინაგან საქმეთა სამინისტროს ინფორმაციით, ბათუმში ყაჩაღობის ბრალდებით 2000 წელს დაბადებული, წარსულში ნასამართლევი ბ.ა. ცხელ კვალზე დააკავეს.
გამოძიების თანახმად, შემთხვევა მიმდინარე წლის 14 იანვარს მოხდა. ბრალდებული ბათუმში მდებარე სუპერმარკეტების ქსელის ერთ-ერთ ფილიალს თავს დაესხა. სამართალდამცველების ცნობით, მან დანის დემონსტრირებით მოლარე-ოპერატორს ფული გასტაცა და შემთხვევის ადგილიდან მიმალვას შეეცადა.
პოლიციამ ეჭვმიტანილი შემთხვევის ადგილზევე შეაჩერა და ბრალდებულის სახით დააკავა. დაკავებისას პოლიციელებმა ყაჩაღობის გზით დაუფლებული თანხა და დანა ნივთმტკიცებად ამოიღეს.
საქმეზე გამოძიება საქართველოს სისხლის სამართლის კოდექსის 179-ე მუხლით მიმდინარეობს, რაც ყაჩაღობას გულისხმობს და 7 წლამდე ვადით თავისუფლების აღკვეთას ითვალისწინებს.
