შინაგან საქმეთა სამინისტროს ინფორმაციით, განსაკუთრებით დიდი ოდენობით ნარკოტიკული საშუალებებისა და ფსიქოტროპული ნივთიერებების უკანონო შეძენა-შენახვისა და საქართველოში შემოტანის ბრალდებით ორი პირი დააკავეს.
დაკავებულები არიან გერმანიის ფედერაციის მოქალაქე, 1994 წელს დაბადებული მ.ჰ. და თურქეთის რესპუბლიკის მოქალაქე, 1998 წელს დაბადებული ა.ქ.
უწყების ცნობით, ერთ-ერთი დაკავება განხორციელდა აჭარაში, სახელმწიფო საზღვარზე მდებარე სასაზღვრო გამშვებ პუნქტ „სარფის“ ტერიტორიაზე, სადაც ეჭვმიტანილი შესაბამისი საგამოძიებო მოქმედებების შედეგად დააკავეს. მეორე პირი კი თბილისის საერთაშორისო აეროპორტში აიყვანეს.
ბრალდებულების პირადი და სამგზავრო ჩანთების ჩხრეკისას ამოღებულია სხვადასხვა სახის ნარკოტიკული საშუალება და ფსიქოტროპული ნივთიერება, მათ შორის: „კოკაინი“, „მეტამფეტამინი“ და „პრეგაბალინი“.
საქმეზე გამოძიება საქართველოს სისხლის სამართლის კოდექსის 260-ე, 261-ე, 261-ე პრიმა და 262-ე მუხლებით მიმდინარეობს, რაც განსაკუთრებით მძიმე დანაშაულს ითვალისწინებს და 12 წლამდე ვადით თავისუფლების აღკვეთას გულისხმობს.
