ბათუმის საერთაშორისო აეროპორტის გაფართოება დღის წესრიგში დგას – ამის შესახებ TAV Georgia-ს გენერალურმა მენეჯერმა თეა ზაქარაძემ ჟურნალისტებთან საუბრისას განაცხადა.
მისი თქმით, მმართველი კომპანია „ქართული ოცნების“ მთავრობასთან აქტიურ მოლაპარაკებებს აწარმოებს და პროცესი, სავარაუდოდ, უახლოეს ორ-სამ თვეში დასრულდება. თეა ზაქარაძის განმარტებით, აეროპორტის გაფართოება აუცილებელია გაზრდილი მგზავრთნაკადის გამო.
„ბათუმის საერთაშორისო აეროპორტმა წელს დაახლოებით 1 მილიონ 200 ათასი მგზავრით დახურა წელი, მაშინ როცა მისი გამტარუნარიანობა 1 მილიონ 400 ათას მგზავრზეა გათვლილი. არსებული მონაცემებიდან გამომდინარე, ბათუმშიც სასწრაფოდ გვჭირდება გაფართოება. ამ მიმართულებით მუშაობა უკვე მიმდინარეობს და ვფიქრობთ, რომ მარტისთვის ბათუმის აეროპორტთან დაკავშირებით ახალი დეტალების წარმოდგენას შევძლებთ“, – განაცხადა თეა ზაქარაძემ.
