შინაგან საქმეთა სამინისტროს გენერალური ინსპექციის თანამშრომლებმა, მოსამართლის განჩინების საფუძველზე, ქრთამის აღების ბრალდებით 2002 წელს დაბადებული ა.მ. დააკავეს.
გამოძიებით დადგინდა, რომ შინაგან საქმეთა სამინისტროს დაცვის პოლიციის დეპარტამენტის მოსამსახურე ა.მ. ბათუმის ბულვარში, მის სამოქმედო ტერიტორიაზე, გარევაჭრობის მფარველობის სანაცვლოდ მოქალაქისგან ქრთამის სახით გარკვეული ოდენობის თანხას იღებდა.
გენერალური ინსპექციის მიერ ჩატარებული საგამოძიებო მოქმედებების შედეგად ა.მ. ბრალდებულის სახით იქნა დაკავებული.
ფაქტზე გამოძიება საქართველოს სისხლის სამართლის კოდექსის 338-ე მუხლის პირველი ნაწილით მიმდინარეობს, რაც 6-დან 9 წლამდე ვადით თავისუფლების აღკვეთას ითვალისწინებს.
