ბათუმის დრამატულ თეატრში დაგეგმილი სპექტაკლის გარშემო შექმნილ ვითარებას რეჟისორი გეგა განიძე სოციალურ ქსელში ვრცელი განცხადებით გამოეხმაურა.
მისი შეფასებით, თეატრის ადმინისტრაციის გადაწყვეტილება „გამოწვეულია უმეცრებითა და უგუნურებით“ და პასუხისმგებლობა ადმინისტრაციასთან ერთად სამხატვრო საბჭოსაც ეკისრება.
„დრო-ჟამი ამას გვიქადის… რა გითხრათ? რით გაგახაროთ?” – წერს რეჟისორი და აღნიშნავს, რომ „ასე ხდება მაშინ, როცა საჯარო თანამდებობაზე ხელდასხმული ადამიანი პასუხისმგებელია მის ხელდამსხმელთან და არა საზოგადოების წინაშე“.
განიძის თქმით, გადაწყვეტილებამდე ერთი დღით ადრე თეატრის დირექტორმა შეატყობინა, რომ „მაღლა“ ზარი იყო შესული და თუ სპექტაკლში პოლიტიკური ნარატივი დარჩებოდა, პრემიერა ვერ შედგებოდა.
„იმ ერთ ცხოვრებას რა ვუთხარი, ჩემს შემოქმედებაში ვინმეს მაამებლად რაიმეს ვიტყვი, ან რაიმეზე დავდუმდები“, – წერს რეჟისორი.
მისივე განცხადებით, ადმინისტრაციასთან ერთად „თანაბრად პასუხისმგებელია თეატრის სამხატვრო საბჭო“, მათ შორის ის წევრები, „რომლებიც მხოლოდ საზოგადოების რეაქციის შემდეგ აღშფოთდნენ და გაემიჯნენ თეატრის ადმინისტრაციის განცხადებას. ამას ფლიდობა ეწოდება“.
რეჟისორი ასევე აღნიშნავს: „მე მართალი ვარ შემოქმედებით ჯგუფთან, რომელთან ერთადაც 2 თვეზე მეტი ვიშრომე! მართალი ვარ თეატრის წინაშე. მართალი ვარ ბათუმელებთან; გათენებულ ღამეებთან, საკუთარ პროფესიასთან; საკუთარ სინდისთან და სამოქალაქო პოზიციასთან“.
განიძე მადლობას უხდის სპექტაკლის შემოქმედებით და ტექნიკურ ჯგუფს -მსახიობებს, მუსიკისა და სცენოგრაფიის ავტორებს, ასევე თეატრის თანამშრომლებს – და აცხადებს: „არსად არ მივდივარ. არც პოლიტიკური თავშესაფარი მჭირდება, არც ‘რეპრესირებული ხელოვანის’ სტატუსი. ვრჩები ჩემს სამშობლოში და ვაგრძელებ ჩემი საყვარელი საქმის კეთებას“.
ცნობისთვის, ბათუმის დრამატულ თეატრში დაგეგმილი სპექტაკლი „DARK WEB“ არ გაიმართება. ადმინისტრაციის გადაწყვეტილებით, პრემიერა, რომელიც 7–8 თებერვალს იყო ჩანიშნული, გაუქმდა.
თეატრის მიერ გავრცელებულ განცხადებაში აღნიშნულია, რომ საპრემიერო ჩვენებამდე ორი დღით ადრე ადმინისტრაციისთვის ცნობილი გახდა ინფორმაცია, რომლის მიხედვითაც სპექტაკლის რეჟისორი თეატრის დიდ სცენაზე სუბიექტური პოლიტიკური აქტის განხორციელებას გეგმავდა.
