თურქეთში აქტიურ ფაზაში გადადის შავი ზღვის სანაპიროს რკინიგზის პროექტი, რომელიც სამსუნიდან დაიწყება და სარფის საბაჟოსთან დასრულდება. პროექტი გათვალისწინებულია 2026 წლის საინვესტიციო დოკუმენტში და ამ ეტაპზე მოიცავს ტექნიკურ-ეკონომიკურ კვლევებსა და პროექტირების სამუშაოებს.
ინფრასტრუქტურული გეგმის მიხედვით, რკინიგზის ხაზის საერთო სიგრძე დაახლოებით 513 კილომეტრი იქნება და შავი ზღვის სანაპიროს გასწვრივ გაივლის რამდენიმე სტრატეგიულ რეგიონს. პროექტი მოიცავს 14 სადგურის მოწყობას და გათვლილია როგორც სამგზავრო, ისე ტვირთბრუნვის მომსახურებაზე.
თურქული მედიის ინფორმაციით, დაგეგმილია მაღალსიჩქარიანი სარკინიგზო ინფრასტრუქტურის მოწყობა. მატარებლების მაქსიმალური სიჩქარე კი დაახლოებით 250 კმ/სთ იქნება. ეს მნიშვნელოვნად შეამცირებს მგზავრობის დროს სანაპირო ქალაქებს შორის და ალტერნატივას შეუქმნის ავტოსატრანსპორტო გადაზიდვებს. ამ ეტაპზე რკინიგზის დასრულების კონკრეტული ვადები დასახელებული არ არის.
