სურსათის ეროვნული სააგენტოს აჭარის დეპარტამენტის ინსპექტორებმა ჩატარებული მოკვლევის შედეგად არალეგალური სასაკლაო გამოავლინეს. სააგენტოს ინფორმაციით, ფიზიკური პირი ზ. ბ. აჭარისა და გურიის რეგიონების სოფლებში ყიდულობდა მსხვილფეხა საქონელს, რომელსაც ვეტერინარული ზედამხედველობის გარეშე კლავდა.
დაკლული ცხოველების დამუშავება მისი საცხოვრებელი სახლის ეზოში მოწყობილ დამხმარე სათავსოში ხდებოდა, რის შემდეგაც ხორცის რეალიზაციას ახდენდა. ბიზნესოპერატორი დაჯარიმდა, ხოლო ინსპექტირებისას ამოღებული, ვეტერინარული ზედამხედველობის გარეშე დაკლული საქონლის ხორცი კანონმდებლობის შესაბამისად განადგურდა.
სურსათის ეროვნული სააგენტო მოსახლეობას აფრთხილებს, რომ ცხოველის ვეტერინარული ზედამხედველობის გარეშე დაკვლა საფრთხეს უქმნის ადამიანის ჯანმრთელობასა და სიცოცხლეს და ზრდის ზოონოზური დაავადებების გავრცელების რისკს.
