ბათუმში, ქალაქის შუაგულში, ევროპის მოედანზე მდებარე კულტურული მემკვიდრეობის ძეგლზე უნებართვო სამშენებლო სამუშაოები ისე განხორციელდა, რომ მაკონტროლებელმა უწყებამ გარკვეული პერიოდის განმავლობაში დარღვევა ვერ აღმოაჩინა.
ყოფილი პირველი აფთიაქის ისტორიულ შენობაზე კომპანიამ ლიფტის შახტი ააშენა, რის გამოც საზოგადოება „ჟასმინი“ დაჯარიმდა.
აჭარის კულტურული მემკვიდრეობის დაცვის სააგენტოში განმარტავენ, რომ საზოგადოებამ კანონმდებლობა არაერთხელ დაარღვია. მიუხედავად არაერთი მითითებისა, სამშენებლო სამუშაოები მაინც გაგრძელდა.
სააგენტოს ცნობით, ამ ეტაპზე ლიფტის შახტის დემონტაჟი მიმდინარეობს.
„მემედ აბაშიძის ქუჩის №34-ში მდებარე შენობაზე სააქციო საზოგადოება „ჟასმინმა“ უნებართვოდ განახორციელა ლიფტის შახტის მოწყობის სამუშაოები. აღნიშნული კომპანია დარღვევის გამო რამდენჯერმე დაჯარიმდა, ხოლო დაკისრებული ჯარიმების საერთო ოდენობა 80 000 ლარს შეადგენს. მიმდინარე წელს კომპანიამ სააგენტოში წარმოადგინა საპროექტო ცვლილების დოკუმენტაცია, რომელიც ითვალისწინებს შენობის სახურავზე ლიფტის შახტის მოწყობას. თუმცა, აღნიშნულ ცვლილებაზე შესაბამისი ნებართვა ამ დრომდე გაცემული არ არის. ამჟამად მიმდინარეობს უნებართვოდ დაშენებული შახტების დემონტაჟი,“ – განუცხადეს „აჭარა თაიმსს“ სააგენტოში.
ევროპის მოედანზე მდებარე ყოფილი პირველი აფთიაქის შენობა ქალაქის ერთ-ერთი გამორჩეული ისტორიული ნაგებობაა. კულტურული მემკვიდრეობის ძეგლი XX საუკუნის დასაწყისში აშენდა და მისი არქიტექტურა რენესანსულ-ბაროკული და მოდერნის სტილის ელემენტებს აერთიანებს.
ორსართულიანი, მანსარდიანი შენობა გამოირჩევა მდიდარი დეკორატიული გაფორმებით, შპილიანი გუმბათებით, თაღოვანი სარკმლებითა და ნაძერწი ორნამენტებით. ისტორიულ ნაგებობას ხუთი შესასვლელი აქვს, ხოლო ერთ-ერთი მხრიდან შიდა ეზოში თაღოვანი გასასვლელია მოწყობილი.
შენობას გასული საუკუნისა და თანამედროვე პერიოდის განმავლობაში არაერთი რეკონსტრუქცია ჩაუტარდა. თავდაპირველად ის ორსართულიანი იყო, მოგვიანებით კი მანსარდა და გუმბათები დაემატა, ფასადები კი დეკორატიული ელემენტებით გაფორმდა.
სპეციალისტების შეფასებით, ყოფილი პირველი აფთიაქის შენობა არა მხოლოდ არქიტექტურული ღირებულებით, არამედ ქალაქგეგმარებითი თვალსაზრისითაც განსაკუთრებული მნიშვნელობისაა, რადგან ევროპის მოედნის განაშენიანებაში დომინანტისა და მაორგანიზებელი ნაგებობის ფუნქციას ასრულებს.
