შინაგან საქმეთა სამინისტროს ცნიბით, ნარკოდანაშაულის ბრალდებით 121 პირი დააკავეს. მათგან 59, გამოძიების ინფორმაციით, სხვადასხვა ფორმით ნარკორეალიზაციის სქემაში იყო ჩართული. დაკავებულებს შორის არიან როგორც საქართველოს, ისე უცხო ქვეყნის მოქალაქეები.
სამინისტროს ინფორმაციით, მოსამართლის განჩინების საფუძველზე პოლიციამ არაერთხელ განახორციელა ნარკოტიკული საშუალებების საკონტროლო შესყიდვა, რომელიც ფარული აუდიო და ვიდეოჩანაწერებით დაფიქსირდა.
ასევე, დააკავეს პირები, რომელთა გამოსავლენად მათ სახელზე შენიღბულად გამოგზავნილი ამანათები ჩაანაცვლეს. ამ ოპერაციის ფარგლებში განსაკუთრებით დიდი ოდენობით ნარკოტიკული საშუალებები ნივთმტკიცებად ამოიღეს.
გამოძიების ფარგლებში ჩატარებული ჩხრეკებისა და საგამოძიებო ექსპერიმენტების შედეგად, ბრალდებულების საცხოვრებელი სახლებიდან, ავტომობილებიდან და მათ მიერ მითითებული ადგილებიდან ამოღებულია სარეალიზაციოდ გამზადებული განსაკუთრებით დიდი ოდენობით სხვადასხვა სახის ნარკოტიკული საშუალება და ფსიქოტროპული ნივთიერება, მათ შორის: მეთადონი, „ალფა-PVP“, კოკაინი, კეტამინი, ბუპრენორფინი, მარიხუანა, მცენარე კანაფი და სხვა.
პოლიციამ ასევე ამოიღო ნარკოტიკული საშუალებების დაფასოებისთვის საჭირო მასალები, ელექტრო სასწორები და, სავარაუდოდ, ნარკოტიკების რეალიზაციის შედეგად მიღებული ფული.
გამოძიება საქართველოს სისხლის სამართლის კოდექსის 260-ე, 260-ე ტერცია, 260-ე კვარტა, 261-ე და 265-ე პრიმა მუხლებით მიმდინარეობს. აღნიშნული დანაშაულები 20 წლამდე ან უვადო თავისუფლების აღკვეთას ითვალისწინებს.
უწყების მონაცემებით, 2026 წლის პირველი ექვსი თვის განმავლობაში ნარკოდანაშაულის ბრალდებით პასუხისგებაში დაახლოებით 5 000 პირი მიეცა, მათგან თითქმის 1 000 ნარკორეალიზაციის სხვადასხვა ფორმაში იყო ჩართული.
სამინისტროს ინფორმაციით, გასული წლის ანალოგიურ პერიოდთან შედარებით, ნარკოდანაშაულის ბრალდებით პასუხისგებაში მიცემული პირების რაოდენობა 85%-ით გაიზარდა.
