„ქართული ოცნების“ პროკურატურა, ძალადობით, სამსახურებრივი უფლებამოსილების გადამეტების ბრალდებით, შინაგან საქმეთა სამინისტროს სამი ყოფილი თანამშრომლის დაკავების შესახებ ინფორმაციას ავრცელებს.
გამოძიებით დადგინდა, რომ 2022 წლის ივლისში შსს-ის იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის სამი თანამშრომელი სამსახურებრივი მივლინებით აჭარის რეგიონში იმყოფებოდა. ერთ-ერთ სისხლის სამართლის საქმეზე მუშაობის პროცესში მათ ქობულეთის რაიონული სამმართველოს ადმინისტრაციულ შენობაში სამი მოქალაქე მიიყვანეს, რა დროსაც, გამოძიების ვერსიით, გადაამეტეს სამსახურებრივ უფლებამოსილებას და მოქალაქეებს სიტყვიერი და ფიზიკური შეურაცხყოფა მიაყენეს.
პროკურატურის ინფორმაციით, აღნიშნული ქმედებებით არსებითად დაირღვა მოქალაქეთა უფლებები და სახელმწიფოს კანონიერი ინტერესები. საქმეზე გამოძიება შსს-ის გენერალური ინსპექციის მიმართვის საფუძველზე დაიწყო.
სამივე ბრალდებული 2026 წლის 23 თებერვალს, სასამართლოს განჩინების საფუძველზე დააკავეს. მათ ბრალდება საქართველოს სისხლის სამართლის კოდექსის 333-ე მუხლის მე-3 ნაწილის „ბ“ ქვეპუნქტით – ძალადობით სამსახურებრივი უფლებამოსილების გადამეტების ფაქტზე – წარედგინებათ, რაც 5-დან 8 წლამდე თავისუფლების აღკვეთას ითვალისწინებს.
პროკურატურა სასამართლოს კანონით დადგენილ ვადაში მიმართავს შუამდგომლობით, ბრალდებულებისთვის აღკვეთის ღონისძიების შეფარდების მოთხოვნით.
