საბაჟო გამშვებ პუნქტ „სარფზე“ მებაჟე ოფიცრებმა დიდი ოდენობით ოქროსა და ვერცხლის ნაკეთობების არადეკლარირებული შემოტანის ფაქტი გამოავლინეს.
შემოსავლების სამსახურის ინფორმაციით, უცხო ქვეყნის მოქალაქისა და მისი მართვის ქვეშ არსებული ავტომობილის დეტალური დათვალიერების შედეგად, სამართალდამცველებმა მცირე ზომის ხელჩანთასა და ავტომობილის სალონში მოწყობილ სხვადასხვა სივრცეში დამალული 420 გრამი ოქროსა და 27 გრამი ვერცხლის ნაკეთობები აღმოაჩინეს.
უწყების ცნობით, სავალდებულო დეკლარირებას დაქვემდებარებული, მაგრამ არადეკლარირებული საქონლის საერთო საბაჟო ღირებულებამ 135 545 ლარი შეადგინა.
ფაქტთან დაკავშირებით, კანონდამრღვევი მოქალაქის მიმართ შედგენილი საქმის მასალები შემდგომი რეაგირების მიზნით საქართველოს ფინანსთა სამინისტროს საგამოძიებო სამსახურს გადაეგზავნა.
