სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა აჭარაში ჩატარებული ოპერატიულ-საგამოძიებო მოქმედებების შედეგად ქობულეთსა და ხულოში კორუფციული ხასიათის რამდენიმე დანაშაულის ფაქტი გამოავლინეს და რამდენიმე პირი დააკავეს.
სუს-ის ინფორმაციით, ქობულეთში სამსახურებრივი უფლებამოსილების ბოროტად გამოყენებისა და თაღლითობის მცდელობის ბრალდებით ორი პირი დააკავეს. გამოძიების ცნობით, ერთ-ერთი დაკავებული განათლებისა და მეცნიერების სამინისტროს პროფესიული სასწავლებლის – სსიპ საზოგადოებრივი კოლეჯ „ახალი ტალღის“ პროფესიული კურსის კოორდინატორი ეთერ ანანიძეა.
უწყების ინფორმაციით, მან წინასწარი შეთანხმებით დანაშაულებრივ კავშირში მყოფ პირთან ერთად ერთ მოქალაქეს პროფესიული სასწავლებლის კურსდამთავრებულის ყალბი სერტიფიკატი დაუმზადა. სახელმწიფო უსაფრთხოების სამსახურის ცნობით, აღნიშნულ ფაქტზე გამოძიება მიმდინარეობს სამსახურებრივი უფლებამოსილების ბოროტად გამოყენებისა და თაღლითობის მცდელობის მუხლებით. საქმეზე საგამოძიებო მოქმედებები გრძელდება.
ამავე დროს, სუს-ის ანტიკორუფციულმა სააგენტომ ხულოს მუნიციპალიტეტშიც დააკავა მერიის ყოფილი თანამშრომლები, სამუშაოების ზედამხედველი კომპანიის წარმომადგენლები და სამუშაოების შემსრულებელი კომპანიების ყოფილი ხელმძღვანელი პირები. ბრალდებულთა შორისაა ზაზა აბულაძე, მერიის ინფრასტრუქტურის სამსახურის უფროსი. მისი თქმით, ბრალდებასთან დაკავშირებით გაურკვევლობა არსებობს და იმედოვნებს, რომ სიმართლე მალე გამჟღავნდება.
„ბრალი წარდგენილი მაქვს გულგრილობის მუხლით, მაგრამ მე ხვალ მაინც მივდივარ სამსახურში. ჯერ დაკავებული არ ვარ,“ – განაცხადა ზაზა აბულაძემ ჩვენთან საუბრისას.
„ჩემი შვილი რა შუაშია,“ – თქვა მან ყურმილის გათიშვამდე.
