დღეს, მუსლიმები რამადან ბაირამს აღნიშნავენ. ლოცვა გაიმართა ორთაჯამესა და ახალ მეჩეთში, სადაც ასობით ადამიანი შეიკრიბა. ტრადიციულად, სივრცის სიმცირისა და ახალი მეჩეთის არქონის გამო, მორწმუნეებს ლოცვის შესრულება ღია ცის ქვეშ – ორთაჯამის ეზოსა და მიმდებარე ტერიტორიაზე მოუწიათ.
წლების განმავლობაში მუსლიმი თემი ახალ მეჩეთზე მშენებლობის ნებართვას ითხოვს, თუმცა საკითხი ამ დრომდე მოუგვარებელია.
⇒ „ჩაწიე კამერა“ თორნიკე რიჟვაძე არ პასუხობს კითხვას, როდის აშენდება ბათუმში მეჩეთი
რამადან ბაირამს წინ უძღვის ერთთვიანი მარხვა, რომლის განმავლობაშიც მორწმუნეები მზის ამოსვლიდან მზის ჩასვლამდე საკვებსა და წყალს არ იღებენ. მარხვის დასრულების დღეს მუსლიმები ერთ-ერთ უმნიშვნელოვანეს რელიგიურ დღესასწაულს – რამადან ბაირამს აღნიშნავენ.
ლოცვის დასრულების შემდეგ დასავლეთ საქართველოს მუფთმა, ადამ შანთაძემ, საქართველოს მართლმადიდებელ ეკლესიასა და მართლმადიდებელ მრევლს კათოლიკოს-პატრიარქის გარდაცვალების გამო მიუსამძიმრა.
„მინდა მივუსამძიმრო საქართველოს მართლმადიდებელ ეკლესიას, მართლმადიდებელ მრევლს, სრულიად საქართველოს კათოლიკოს-პატრიარქის ილია მეორეს გარდაცვალების გამო. მისი მრავალწლიანი მოღვაწეობა უმნიშვნელოვანესი იყო რელიგიათაშორისი ურთიერთობის პატივისცემის, მშვიდობის, საზოგადოებრივი ერთიანობის განმტკიცების საქმეში,“ – აღნიშნა ადამ შანთაძემ ჟურნალისტებთან საუბრისას.
⇒ ხის მეჩეთების წარმოჩენისა და პოპულარიზაციის მიზნით ინტერაქტიული რუკა შეიქმნა
ინფორმაციისთვის: აჭარაში 200-მდე მეჩეთია, მათგან 27-ს აქვს ძეგლის სტატუსი, 5 კი დანგრეულია.
