ბათუმში, გვიან ღამით, 26 მაისისა და რუსთაველის ქუჩების გზაჯვარედინთან, წყლის მილის ავარიულმა დაზიანებამ გზის საფარის ჩანგრევა გამოიწვია, რის შედეგადაც ადგილზე მდგომი ავტომობილი ორმოში ჩავარდა. როგორც ბათუმის მერიაში აცხადებენ, ავარიულად დაზიანდა 355 მმ დიამეტრის წყლის მილი.
წყლის ძლიერი ნაკადის ამოხეთქვის შედეგად მიწის მასა ჩაიშალა, რამაც ავტომობილის ჩავარდნა გამოიწვია. წყალი ავტომობილის სალონშიც შევიდა და მნიშვნელოვნად დააზიანა. მომხდარის შედეგად არავინ დაშავებულა.
მერიის ინფორმაციით, დაზიანებული ავტომობილის ზარალი კომპანიის – „ბათუმის წყლის“ მიერ ანაზღაურდება, თუ ფაქტი დადასტურდება. ამ დროისთვის ადგილზე მიმდინარეობს აღდგენითი სამუშაოები.
მერიაში ირწმუნებიან, რომ პირველადი შეფასებით, შემთხვევა არ უკავშირდება 26 მაისის ქუჩაზე მიმდინარე სარეაბილიტაციო სამუშაოებს, რადგან აღნიშნული პროექტი წყალმომარაგების ქსელის განახლებას არ ითვალისწინებდა.
