ქობულეთის მუნიციპალიტეტის საბავშვო ბაღებში დასაქმებულ თანამშრომლებს სამუშაო საათებში მობილური ტელეფონების გამოყენება აეკრძალათ. აღნიშნულის შესახებ „აჭარა თაიმსს“ ბაღების თანამშრომლები ანონიმურად აწვდიან ინფორმაციას.
მათი თქმით, ყოველდღიურად, სამუშაო პროცესის დაწყებამდე, მობილური ტელეფონებს ერთიანად ართმევენ და ინახება ადმინისტრაციაში, კონკრეტულად კი გამგის კაბინეტში, სააღმზრდელო პროცესის დასრულებამდე.
პედაგოგები და სპეციალისტები გვიყვებიან, რომ თავად სასწავლო პროცესის მიმდინარეობისას ტელეფონით ისედაც არ სარგებლობდნენ, თუმცა მშობლებთან ურთიერთობისა და გადაუდებელი შემთხვევებისთვის მათ საკომუნიკაციო საშუალება სჭირდებათ.
ერთ-ერთი პედაგოგი, რომელმაც ანონიმურობის დაცვა ითხოვა, ამბობს, რომ გადაწყვეტილებას წინააღმდეგობა ვერ გაუწიეს:
„ყოველ დილით გვართმევენ ტელეფონებს. სამუშაო დღის განმავლობაში ოჯახის წევრებთან დაკავშირებასაც ვერ ვახერხებთ. ხშირად მშობლები გვიკავშირდებიან ბავშვის მდგომარეობის გასარკვევად, ახლა კი ეს შესაძლებლობა აღარ გვაქვს. თუ მოულოდნელად ბავშვს რაიმე შეემთხვევა, ტელეფონისთვის ქვედა სართულზე უნდა ჩავიდე, ამ დროს კი შეიძლება ჯგუფში შემცვლელი არ მყავდეს,“ – აცხადებს პედაგოგი.
თანამშრომლები აღნიშნავენ, რომ არსებული პრაქტიკა გარკვეულ რისკებსაც ქმნის, განსაკუთრებით იმ შემთხვევებში, როდესაც საჭიროა სწრაფი რეაგირება ან მშობლებთან ოპერატიული კომუნიკაცია.
ფაქტს ადასტურებენ ქობულეთის მერიაში. მათი განმარტებით, აღნიშნული გადაწყვეტილება საბავშვო ბაღების გაერთიანების ახალი დირექტორის ბრძანების საფუძველზე იქნა მიღებული.
დაკავშირებული თემები🔻
მღვდლის მეუღლე ქობულეთის საბავშვო ბაღების გაერთიანების დირექტორად დაინიშნა
