შინაგან საქმეთა სამინისტროს ინფორმაციით, განსაკუთრებით დიდი ოდენობით ნარკოტიკული საშუალების უკანონო შეძენა-შენახვისა და რეალიზაციის ხელშეწყობის ბრალდებით, რუსეთის ფედერაციის მოქალაქე დააკავეს.
უწყების ცნობით, ბათუმში ჩატარებული საგამოძიებო მოქმედებების ფარგლებში ბრალდებულის პირადი და დროებითი საცხოვრებელი ბინები გაჩხრიკეს. ასევე, შემოწმდა მის მიერ მითითებული ადგილები, საიდანაც პოლიციამ სარეალიზაციოდ გამზადებული განსაკუთრებით დიდი ოდენობით ნარკოტიკული საშუალება „გამომშრალი მარიხუანა“ ნივთმტკიცებად ამოიღო.
შსს-ის ინფორმაციით, სამართალდამცველებმა ასევე ამოიღეს ნარკოტიკული საშუალების დაფასოებისთვის საჭირო მასალები.
გამოძიება საქართველოს სისხლის სამართლის კოდექსის 260-ე და 260-ე კვარტა მუხლებით მიმდინარეობს, რაც 17 წლამდე ვადით თავისუფლების აღკვეთას ითვალისწინებს.
