ხულოს საკრებულოს ოპოზიციონერმა დეპუტატმა ბესიკ შაინიძემ წარმომადგენლობითი ორგანო დატოვა. როგორც იგი „აჭარა თაიმსთან“ საუბრისას აცხადებს, გადაწყვეტილება მიიღო იმის გამო, რომ საკრებულოში მისი საქმიანობა რეალურ შედეგს ვერ იძლეოდა.
პარტია „ლელოს“ წევრი, ხულოს საკრებულოს ორი მოწვევის დეპუტატი იყო. ბესიკ შაინიძის თქმით, ადგილობრივ თვითმმართველობაში არსებული გარემო იმდენად მძიმე და ფორმალურია, რომ ოპოზიციური საქმიანობა აზრს კარგავს.
„ამ ფორმით რეჟიმთან ბრძოლა მხოლოდ დროის კარგვაა. ჩემი იქ ყოფნა მარაზმი იყო. მენტალურად იმდენად გამიჭირდა ამდენ ქოცთან ერთად ყოფნა, რომ მივიღე გადაწყვეტილება და ვტოვებ ხულოს საკრებულოს. დეპუტატის მანდატით მოსახლეობისთვის ღირებულს ვერაფერს ვქმნიდი,“ – აცხადებს შაინიძე.
ყოფილი დეპუტატი ხულოს საკრებულოში არსებულ ვითარებას „კომუნისტურ წყობას“ ადარებდა. მისი შეფასებით, გადაწყვეტილებები წინასწარ მიიღება და სხდომები მხოლოდ ფორმალურ ხასიათს ატარებს.
შაინიძის თქმით, საკრებულოს სხდომები ხშირად ნახევარ საათსაც არ გრძელდება და მმართველი პარტიის წევრები ყველა საკითხს ერთხმად უჭერენ მხარს.
„არსებობენ ერთეული ადამიანები, რომლებიც გადაწყვეტილებებს ზემოდან იღებენ, შემდეგ კი ამ ყველაფერს ხელის აწევით უდასტურებს 26-კაციანი საკრებულო. დეპუტატებს რეალურად აზრის გამოთქმის საშუალება არ ეძლევათ. მათი ერთადერთი ფუნქცია იმ მავნებლური პოლიტიკის დაკანონებაა, რასაც ხულოს მერია ატარებს,“ – ამბობს ბესიკ შაინიძე.
ბესიკ შაინძე ამბობს, რომ საკრებულოს დატოვების შემდეგ ემიგრაციაში წასვლას გეგმავს.
„საკუთარი თავის რეალიზება დღევანდელი მოცემულობით ახალგაზრდას მხოლოდ ევროპაში შეუძლია. აქ მომავლის სიკეთით ხედვას ვერ ვხედავ. ვისთან ერთადაც გავიზარდე, თითქმის ყველა ემიგრაციაშია და მეც სადღაც მივიღე გადაწყვეტილება, რომ შეიძლება გამოვიდე კომფორტის ზონიდან და ემიგრაციაში შევიქმნა ახალი შესაძლებლობები საკუთარი თავისთვის,“ – ამბობს ყოფილი დეპუტატი.
