სურსათის ეროვნული სააგენტოს ცნობით, ინსპექტორებმა დაბა ჩაქვში ხორცპროდუქტების უკანონო საწარმო გამოავლინეს. შემოწმება არაგეგმური სახელმწიფო კონტროლის ფარგლებში განხორციელდა.
სააგენტოს ინფორმაციით, ობიექტი მდებარეობს იაკობ გოგებაშვილის II შესახვევში N30-ში. ინსპექტირების შედეგად დადგინდა, რომ ბიზნესოპერატორი ეკონომიკურ საქმიანობათა რეესტრში რეგისტრაციისა და სავალდებულო აღიარების გარეშე საქმიანობდა.
ამასთან, უწყების ცნობით, საწარმოო პროცესში გამოვლინდა კრიტიკული შეუსაბამობები, რაც მომხმარებლის ჯანმრთელობისთვის საფრთხის შემცველად შეფასდა.
სურსათის ეროვნული სააგენტოს გადაწყვეტილებით, ბიზნესოპერატორი, ინდმეწარმე ა.დ. დაჯარიმდა, ხოლო საწარმოო პროცესი კრიტიკული შეუსაბამობების სრულ აღმოფხვრამდე შეუჩერდა.
