თურქეთის სასამართლომ საქართველოს მოქალაქის, მარინა გვალაძის მიმართ აღძრული სისხლის სამართლის საქმე ხანდაზმულობის ვადის გასვლის გამო შეწყვიტა.
სასამართლოს მიერ გამოქვეყნებული განცხადების მიხედვით, მარინა გვალაძეს ოფიციალური დოკუმენტის გაყალბებას ედავებოდნენ. თუმცა, სასამართლომ დაადგინა, რომ საქმეზე სისხლისსამართლებრივი დევნის ხანდაზმულობის ვადა ამოიწურა, რის გამოც საქმის წარმოება შეწყდა.
განჩინებაში აღნიშნულია, რომ ბრალდებულისთვის დასაბუთებული გადაწყვეტილების ჩაბარება, მიუხედავად არაერთი მცდელობისა, ვერ მოხერხდა, რის გამოც სასამართლომ საჯარო გამოქვეყნების წესით შეტყობინება გადაწყვიტა.
სასამართლოს გადაწყვეტილებით, განაჩენი გამოქვეყნებიდან 15 დღის გასვლის შემდეგ ჩაბარებულად ჩაითვლება. ამ ვადის გასვლის შემდეგ მხარეს ორი კვირის განმავლობაში შეუძლია სააპელაციო საჩივრის შეტანა, წინააღმდეგ შემთხვევაში გადაწყვეტილება საბოლოოდ შევა კანონიერ ძალაში.
