ბათუმის საერთაშორისო აეროპორტის მმართველი კომპანიის ცნობით, ტერმინალის გაფართოების სამუშაოები მიმდინარეობს. პროექტის დასრულების შემდეგ აეროპორტის გამტარუნარიანობა 22-25%-ით გაიზრდება.
არსებულ 8 000 კვადრატულ მეტრ ფართობს დაახლოებით 1 000 კვადრატული მეტრი ახალი სივრცე ემატება, რომელიც საოპერაციო და ადმინისტრაციულ ზონებს მოიცავს.
პროექტის ფარგლებში სარეგისტრაციო დახლების რაოდენობა 14-დან 18-მდე იზრდება, რაც რეგისტრაციის პროცესს დააჩქარებს. ასევე ფართოვდება სასაზღვრო კონტროლის ზონა, საპასპორტო შემოწმების ჯიხურების რაოდენობა 5-მდე გაიზრდება, რის შედეგადაც გასასვლელების საერთო რაოდენობა 8-დან 10-მდე მოიმატებს.
კომპანიის მიერ გავრცელებულ ინფორმაციაში აღნიშნულია, რომ უკვე დასრულებულია Duty Free ზონის გაფართოება. განახლებული სავაჭრო სივრცე თანამედროვე სტანდარტების შესაბამისად მოეწყო, სრულად არის შევსებული პროდუქციით და უკვე ემსახურება მგზავრებს.
ტერმინალის მიმდებარე შენობაში 450 კვადრატულ მეტრ ფართობზე დასრულდა ადმინისტრაციული ოფისების რეაბილიტაცია და აღჭურვა. ადმინისტრაციული პერსონალის ახალ სივრცეში გადაყვანის შემდეგ ტერმინალის შიგნით დამატებითი საოპერაციო ფართობი გათავისუფლდება.
ამჟამად მიმდინარეობს გამგზავრების ზონის შესასვლელისა და საპასპორტო კონტროლის სივრცეების გაფართოება. პროექტი ასევე ითვალისწინებს საბარგო კარუსელების დაგრძელებასა და მოდერნიზებას.
აეროპორტის ადმინისტრაციის ინფორმაციით, ყველა სამშენებლო და სარეაბილიტაციო სამუშაო საერთაშორისო საავიაციო სტანდარტების სრული დაცვით ხორციელდება.
