ერთიანი ეროვნული გამოცდების პირველი სესია აჭარაში მშვიდ ვითარებაში მიმდინარეობს. შეფასებისა და გამოცდების ეროვნული ცენტრის ინფორმაციით, ბათუმსა და ხულოში მოქმედ საგამოცდო ცენტრებში აბიტურიენტების უმეტესობა გამოცდაზე გამოცხადდა.
ბათუმში სამ საგამოცდო ცენტრში ჯამში დაახლოებით 4400 აბიტურიენტია რეგისტრირებული.
დღევანდელი პირველი სესიის მონაცემებით:
- ბათუმის №1 საჯარო სკოლის საგამოცდო ცენტრში 357 რეგისტრირებული აბიტურიენტიდან გამოცდაზე 342 გამოცხადდა;
- ბათუმის №9 საჯარო სკოლის ცენტრში 372 რეგისტრირებულიდან გამოცხადდა 357;
- ბათუმის №10 საჯარო სკოლის ცენტრში 340 აბიტურიენტიდან გამოცდას 327 ესწრებოდა.
რაც შეეხება ხულოს საგამოცდო ცენტრს, აქ სულ 95 აბიტურიენტია რეგისტრირებული. პირველი სესიისთვის რეგისტრირებული 48 აბიტურიენტიდან გამოცდაზე 45 გამოცხადდა.
დღეს აბიტურიენტები ქართულ ენასა და ლიტერატურაში აბარებენ გამოცდას. ერთიანი ეროვნული გამოცდები რამდენიმე კვირის განმავლობაში გაგრძელდება და 22 ივლისს ფიზიკის გამოცდით დასრულდება.
