შინაგან საქმეთა სამინისტროს ინფორმაციით, საგამოძიებო მოქმედებების შედეგად, ორგანიზებული ჯგუფის მიერ დიდი ოდენობით თანხის თაღლითურად დაუფლების ბრალდებით, მოსამართლის განჩინების საფუძველზე, უცხო ქვეყნის ერთი მოქალაქე დააკავეს, ხოლო უცხო ქვეყნის კიდევ ორ მოქალაქეს ბრალი წარედგინა – ერთ-ერთს დაუსწრებლად, მეორეს კი პენიტენციურ დაწესებულებაში.
გამოძიების ინფორმაციით, ბრალდებულებმა დიდი ოდენობით ფინანსური სარგებლის უკანონოდ მიღების მიზნით დანაშაულებრივი ჯგუფი შექმნეს და წევრებს შორის კონკრეტული როლები გადაანაწილეს.
შსს-ის ცნობით, ისინი აჭარის რეგიონში მშენებლობა-რემონტით დაინტერესებულ მოქალაქეებს სხვადასხვა სამშენებლო სამუშაოს შესრულებას ყალბი რეკლამებისა და ფიქტიური ხელშეკრულებების გამოყენებით ჰპირდებოდნენ. ბრალდებულები დაზარალებულებისგან თანხებს წინასწარ იღებდნენ, თუმცა აღებულ ვალდებულებებს არ ასრულებდნენ.
გამოძიებით დადგენილია, რომ დანაშაულებრივი ჯგუფის წევრებმა მართლსაწინააღმდეგოდ მიითვისეს 428 250 აშშ დოლარი, 10 100 ლარი და 400 000 სომხური დრამი.
საქმეზე გამოძიება საქართველოს სისხლის სამართლის კოდექსის 180-ე მუხლის მე-3 და მე-4 ნაწილებით მიმდინარეობს, რაც 10 წლამდე ვადით თავისუფლების აღკვეთას ითვალისწინებს.
