„აჭარა თაიმსის“ ინფორმაციით, წვიმის შედეგად ქობულეთის მუნიციპალიტეტში 15-მდე სოფელში მეწყრული პროცესები განვითარდა.
სხვადასხვა მიმართულებით ჩამოშლილმა მიწის მასამ დააზიანა შიდა სასოფლო გზები და ელექტროგადამცემი ხაზები.
მეწყრული პროცესები დაფიქსირდა სოფელ ქობულეთში, ლეღვაში, დაგვაში, კონდიდში, ჯიხანჯურში, ცეცხლაურში, ასევე ჩაქვის ადმინისტრაციულ ერთეულში შემავალ რამდენიმე სოფელში. ეს იმ დასახლებების არასრული ჩამონათვალია, სადაც სტიქიის შედეგად პრობლემები შეიქმნა.
ქობულეთის მერიაში „აჭარა თაიმსს“ განუცხადეს, რომ მოქალაქეებისგან შემოსულია არაერთი განცხადება.
„მერიაში შემოსულია მოქალაქეების განცხადებები, ძირითადად, ეს ეხება საცხოვრებლების მიმდებარედ და საავტომობილო გზებზე მიწის მასის ჩამოშლას. მერიის შესაბამისი სამსახურები სწავლობენ ყველა შემოსულ განცხადებას. ეტაპობრივად დაიწყება საჭირო ღონისძიებების გატარება. შესაბამისი სამსახურების ჩართულობით, მთელი დღის განმავლობაში იწმინდებოდა გზები. ნალექის შედეგად რიგ სოფლებში დაზიანებული იყო ელექტროგადამცემი ხაზები, რის გამოც ელექტროენერგიის მიწოდება მოსახლეობის ნაწილს შეწყვეტილი ჰქონდა. ამ დროისთვის ელექტროენერგიის მიწოდება აღდგენილია“, – აცხადებენ ქობულეთის მერიაში.
