„კონკურენცია გაიზრდება, სამუშაო არ გვექნება. ზამთარში მძღოლები ისედაც მგზავრების სიმცირეს ვუჩივით. ყოველდღიურად ქობულეთის სადგურიდან ფიჭვნარის ბოლომდე, ჩოლოქის ხიდამდე, მოძრაობენ პირველი ნომრის მიკროავტობუსები. დღეს კი, როგორც შევიტყვეთ, ბათუმი-ქობულეთის საქალაქთაშორისო მიკროავტობუსებსაც მიეცათ უფლება, მგზავრები ფიჭვნარის ბოლომდე ჩაიყვანონ, რასაც კატეგორიულად არ მივესალმებით. ცვლილებამდე ბათუმი-ქობულეთის მიკროავტობუსების ბოლო გაჩერება ცენტრალური პარკის ტერიტორია იყო და მიგვაჩნია, რომ ეს არ უნდა შეიცვალოს“.
ეს იმ მძღოლების ნაწილის პოზიციაა, რომლებიც ქობულეთში, ქალაქის ტერიტორიაზე პირველი ნომრის მიკროავტობუსებზე მუშაობენ. ისინი ბათუმში მიმავალ მგზავრებს ცენტრალური პარკის ან სადგურის ტერიტორიამდე ემსახურებიან, რის შემდეგაც მგზავრებს ბათუმი-ქობულეთის საქალაქთაშორისო მიკროავტობუსებით გადაადგილება უწევთ.
ბათუმი-ქობულეთის მიმართულებით მოძრავი მიკროავტობუსებისთვის დაანონსებული ცვლილება, რომელიც მგზავრობის საფასურის 4 ლარამდე გაზრდას და მარშრუტის დაახლოებით 10 კილომეტრით გახანგრძლივებას ითვალისწინებდა, დღეს შეიცვალა.
ცვლილების თავდაპირველი გეგმით, ბათუმი-ქობულეთის მიკროავტობუსების ბოლო გაჩერება ქობულეთის ცენტრალური პარკის ნაცვლად ფიჭვნარის დასახლების ბოლო წერტილი უნდა ყოფილიყო. თუმცა, პირველი ნომრის მიკროავტობუსების მძღოლების მიერ გამოხატული უკმაყოფილების შემდეგ, შეთანხმება შეიცვალა და ბათუმი-ქობულეთის მიკროავტობუსების ბოლო გაჩერებად კვლავ ცენტრალური პარკის ტერიტორია დარჩება. ამასთან, უცვლელი რჩება მგზავრობის საფასური, 4 ლარი.
რატომ გახდა საჭირო თავდაპირველი გადაწყვეტილების შეცვლა და რატომ დარჩა 4-ლარიანი ტარიფი ძალაში, მაშინ როცა მარშრუტის დამატებითი 10-კილომეტრიანი მონაკვეთი აღარ ემატება?
შპს „ხუტას“ დირექტორი ორი დღის წინ „აჭარა თაიმსთან“ აცხადებდა, რომ ბათუმი-ქობულეთის მიმართულებაზე მგზავრობის საფასურის გაზრდა მხოლოდ საწვავის ფასის მატებას არ უკავშირდებოდა. მისი თქმით, ქობულეთის მერიის მოთხოვნის საფუძველზე, დაახლოებით 10 კილომეტრით უნდა გაზრდილიყო მიკროავტობუსების სამოძრაო მარშრუტიც.
თავდაპირველი გადაწყვეტილებით, მიკროავტობუსების ბოლო გაჩერება ქობულეთის ცენტრალური პარკის ნაცვლად ფიჭვნარის დასახლების ბოლო წერტილი უნდა ყოფილიყო, საიდანაც მგზავრებს ყოველდღიურად გადაიყვანდნენ.
დღეს ჩვენ შპს „ხუტას“ წარმომადგენელს დავუკავშირდით. მისი ინფორმაციით, მგზავრობის საფასური კვლავ 4 ლარი იქნება, თუმცა მარშრუტის ცვლილება აღარ იგეგმება.
„ფასი ისევ უცვლელი დარჩა, 4 ლარი. რაც შეეხება მანძილს, შეიცვალა. მძღოლები ფიჭვნარის დასახლებამდე მხოლოდ ბათუმიდან მომავალ იმ მგზავრებს ჩაიყვანენ, რომლებსაც აქამდე ცენტრალური პარკის ტერიტორიამდე ან ქობულეთის სადგურამდე უწევდათ მგზავრობა და შემდეგ სხვა ალტერნატიულ ტრანსპორტში გადაჯდომა, რათა დანიშნულების ადგილამდე მისულიყვნენ“, – ამბობს შპს „ხუტას“ წარმომადგენელი.
აღნიშნულ ცვლილებაზე ქობულეთის ტრანსპორტის რეგულირების დირექტორი მერაბ პაპუნაიშვილი ამბობს, რომ პირველი ნომრის მიკროავტობუსების მძღოლებს უკმაყოფილება ნამდვილად ჰქონდათ გამოხატული.
მისი განმარტებით, ბათუმი-ქობულეთის მიმართულება კერძოა და მუნიციპალურ ტრანსპორტს არ წარმოადგენს, შესაბამისად, ამ მიკროავტობუსების მოძრაობის განრიგი მუნიციპალიტეტის კომპეტენციაში არ შედის. თუმცა, მისივე თქმით, მუნიციპალიტეტმა მხარეებს შორის დიალოგის გზით შეძლო შეთანხმების მიღწევა და ორი დღის წინ მიღებული გადაწყვეტილება შეიცვალა.
ბათუმი-ქობულეთის მიმართულებაზე მიკროავტობუსით მგზავრობა 4 ლარი გახდა
