ბათუმში, ტბელ აბუსერიძის ქუჩაზე “ქართული ოცნების” შემწირველმა კომპანიამ ხეები ჩააბეტონა. ტერიტორიაზე ორი ცათამბჯენი შენდება. ვიდრე არსებული ოთხ სართულიანი კორპუსების დემონტაჟი დაიწყება, მანამდე ტერიტორიის შემოღობვა მიმდინარეობს.
როგორც ადგილზე დასაქმებულებმა გვითხრეს ტროტუარი უსაფრთხოების გამო შემოსაზღვრეს. რკინის კონსტუქციების მონტაჟისას 10-მდე ნაძვი ჩააბეტონეს. ტროტუარის გადაკეტვის შედეგად ქვეითებს ტერიტორიაზე გადაადგილე საავტომობილო გზაზე უწევთ.
მიუხედავად იმისა, რომ ხეების ჩაბეტონება ცენტრალური გზის გასწვრივ, ქალაქის ცენტრში მიმდინარეობს ფაქტი მუნიციპალურ ინსპექციას ამ დრომდე არ შეუნიშნავს.
ინფორმაციისთვის: ტბელ აბუსერიძის ქუჩის 19-სა და 23 ნომერში ორი ცათამბჯენი შენდება. ორივე მშენებლობის ნებართვა ერთ პაკეტშია მოქცეული, კომპანიების სახელწოდებებიც თითქმის იდენტურია (შპს. სკაილაინ ჯგუფი და შპს სკაილაინ გრუპი).
მშენებლობით “ქართული ოცნების” შემწირველი ვასილ ხორავაა დაინტერესებული. მან მმართველ პარტიას ფული ორჯერ შესწირა, ჯამში, 13,000 ₾ ოდენობით. ვასილ ხორავა ასევე, რამდენიმე კომპანიის მეწილე და დირექტორია. ის წლების წინ “საქართველოს რკინიგზის” ინფრასტრუქტურის დირექტორი იყო.
ამ მისამართებიდან რამდენიმე მეტრში კიდევ ერთი ცათაბჯენის მშენებლობა მიმდინარეობს, რომლის გამოც კომპანიამ საავტომობილო გზა მთლიანად შეღობა, რაზე მუნიციპალურ ინსპექციას დღემდე რეაგირება არ მოუხდენია.
