“აჭარაში ყოველთვის წამყვანი კულტურა იყო მეჩაიეობა, რაზეც არაფერი გითქვამს,” – კითხვით აჭარის სოფლის მეურნეობის მინისტრს, დეპუტატმა დავით თედორაძემ მიმართა. ზაზა შავაძემ სამინისტროს საქმიანობის ანგარიში, უმაღლესს საბჭოში წარადგინა, რომლის ფარგლებშიც კანონმდებლების კითხვებსაც უპასუხა.
დავით თედორაძე დაინტერესდა რა პერსპექტივა აქვს მეჩაიეობის დარგს რეგიონში და რა მოლოდინები უნდა ჰქონდეთ ადგილობრივებს.
“ეს მომგებიანი კულტურაა და წესით ბიზნესი დაინტერესებული იქნება. ჩემს სოფელში, ერგეში, უზარმაზარი ტერიტორია უჭირავს ჩაის და ხალხი მუშაობდა წლების წინ. ჩაი გავერანების პირასაა. რა პროგრამები აქვს ამ მიმართულებით სამინისტროს,” – აღნიშნა უმაღლესი საბჭოს პლენარულ სხდომაზე დავით თედორაძემ.
“აჭარა თაიმსი” თემით დაინტერესდა და მინისტრს განმარტება სთხოვა. ზაზა შავაძის თქმით, მეჩაიეობის მივიწყება არახალი თემაა. შავაძე ფერმერებს მეტი აქტიურობისკენ მოუწოდებს.
“ნებისმიერ მეჩაიე ფერმერს აქვს საშუალება რომ მოვიდეს და ჩაერთოს პროგრამებში, რასაც სამინისტრო ახორციელებს. ჩვენ ნებისმიერ შეთხვევაში ვემხრობით დარგის განვითარებას. ფაქტია, რომ ინტერესი დაბალია და შესაბამისად მაგიტომაცაა დარგი ამ მდგომარეობაში. საერთაშორისო და მეზობელ ქვეყანაში არსებული კონკურენციის პირობებში ჩვენ უკეთესი შედეგი არ გვაქვს. მეჩაიეობის მივიწყება არახალი თემაა, კარგი იქნება თუ ვინმე დაინტერესდება,” – განაცხადა “აჭარა თაიმსთან” საუბრისას ზაზა შავაძემ.
რას აკეთებს სამინისტრო დარგი პოპულარიზაციისა და განვითარებისთვის, ასევე, ხედავს თუ არა სამინისტრო შექმნილ ვითარებაში თავის წილ პასუხისმგებლობას – კითხვებზე ზაზა შავაძემ არ გვიპასუხა და ინტერვიუს შეწყვეტა მოითხოვა.
ანგარიშის წარდგენისას მინისტრმა აღნიშნა, რომ სამინისტრო ამ კუთხით დაინტერესებულ პირს ხელს უწყობს. კერძოდ, მისი თქმით, ფინანსური დახმარება შესაძლებელია ტექნიკის შეძენასა და საწარმოს შექმნაზე.
“ნამდვილად საწყენია, რომ ჩვენს რეგიონში ნაკლებად ინტერესდებიან ჩაით,” – თქვა ანგარიშის წარდგენის დასასრულს ზაზა შავაძემ.
აქვე დაგაინტერესებთ: მეთამბაქოეობის სუფსიდირებას ან რაიმეს სახის მხარდაჭერა არ ვაპირებთ – აჭარის სოფლის მეურნეობის მინისტრი
