ლიანა ისაკაძის სახელობის საერთაშორისო ფესტივალმა „ღამის სერენადები“ 17 სექტემბერს კონსერვატორიის დიდ დარბაზში ბრაზილიური მუსიკის საღამოს უმასპინძლა.
ფესტივალის საბაზო ორკესტრმა „საქართველოს ვირტუოზები“ და ახალგაზრდა წარმატებულმა ქართველმა მუსიკოსებმა ლიზი რამიშვილმა, მარიამ როინიშვილმა და გიორგი ოიკაშვილმა სხვადასხვა ეპოქისა და სტილის, ბრაზილიელი კომპოზიტორების ქართველი პუბლიკისთვის ნაკლებად ცნობილ ნაწარმოებები შეასრულეს.
სპეციალურად ამ საღამოსთვის ფესტივალის დაკვეთით შეიქმნა მთელი რიგი ნაწარმოებების საავტორო არანჟირებები სიმებიანი ორკესტრისთვის, რომელმაც გაამდიდრა სიმებიანი ორკესტრისთვის არსებული რეპერტუარი.
გიორგი ისაკაძე, „ღამის სერენადების“ სამხატვრო ხელმძღვანელი:
„წლევანდელ ფესტივალს დიდი სევდა ახლავს თან, გამოვემშვიდობეთ ლეგენდარულ ლიანა ისაკაძეს, თუმცა მან დაგვიტოვა ისეთი ფასდაუდებელი მემკვიდრეობა, რომელიც სულ ჩვენთან იქნება. რაც შეეხება ფესტივალს, „ღამის სერენადების“ მომდევნო კონცერტები გაიმართება თბილისში დღეს და 20 სექტემბერს დაიხურება. საღამოებს თბილისის სახელმწიფო კონსერვატორია უმასპინძლებს.
დიდი მადლობა ჩვენი ფესტივალის მხარდამჭერებს, მათ გარეშე შეუძლებელი იქნებოდა ამ კონცერტების ჩატარება. მადლობა საქართველოს კულტურის და სპორტის სამინისტროს, აჭარის განათლების, კულტურისა და სპორტის სამინისტროს, ქალაქ თბილისის მერიას, ქალაქ ბათუმის მერიას, ქალაქ ბორჯომის მერიას, იტალიის საელჩოს საქართველოში, ბრაზილიის საელჩოს საქართველოში, ჩეხეთის საელჩოს საქართველოში, ეროვნულ სიმფონიურ ორკესტრს, სასტუმროს ჰილტონ გარდენ ინნ თბილისი, სასტუმროს ბორჯომი ლიკანი.“
ოსვალდო ბიატო ჟუნიორი, ბრაზილიის ელჩი საქართველოში:
„ბრაზილიის საელჩო პირველად მონაწილეობს ამ შესანიშნავ ფესტივალში. ბედნიერები ვართ, რომ თქვენს ქვეყანაში ბრაზილიური მუსიკა ძალიან პოპულარულია და მოსწონთ. „ღამის სერენადები“ საქართველოსა და ბრაზილიას შორის ურთიერთობებს კიდევ უფრო გააღრმავებს. მადლობა ორგანიზატორებს, გიორგი ისაკაძესა და ნინა ცაგარელს. კონცერტის მონაწილეებს მადლობას ვუხდი ბრაზილიური მუსიკის არაჩვეულებრივად შესრულებისთვის.“
ლიზი რამიშვილი, მუსიკოსი:
„მართალია, პირადად არ ვიცნობდი ქალბატონ ლიანა ისაკაძეს, მაგრამ უბედნიერესი ვარ, რომ მის მიერ დაარსებულ ფესტივალში მივიღე მონაწილეობა. საბედნიეროდ, პირველად ჩავერთე „ღამის სერენადებში“. ძალიან მიხარია, რომ წილად მხვდა ბედნიერება, მონაწილეობა მიმეღო ბრაზილიური მუსიკის კონცერტში. უღრმესი მადლობა ორგანიზატორებს, მონაწილეებს და მსმენელს ამ დაუვიწყარი ემოციებისთვის.“
მარიამ როინიშვილი, მომღერალი:
„მიხარია, რომ ამ კონცერტის ნაწილი ვიყავი. დიდი პატივია ჩემთვის ამ ფესტივალში მონაწილეობა. ბრაზილიური მუსიკა ნამდვილად არის გამორჩეული, ამიტომაც მისი შესრულება ჩემთვის ძალიან სასიამოვნოა. საღამოს გამორჩეული მსმენელი ესწრებოდა. მადლობა მათ უშურველი ოვაციებისთვის. უდიდესი მადლობა „ღამის სერენადების“ ორგანიზატორებს, რომ მონაწილეებსაც და მსმენელსაც დაუვიწყარ კონცერტებს გვჩუქნის.“
გიორგი ოიკაშვილი, მუსიკოსი:
„ძალიან ბედნიერი ვარ, რომ ისევ მივიღე მონაწილეობა ფესტივალში „ღამის სერენადები“. საოცარი მსმენელი დაგვესწრო და საღამომაც არაჩვეულებრივად ჩაიარა. დიდი მადლობა გიორგი ისაკაძეს, ნინა ცაგარელს, ფესტივალის საბაზო ორკესტრს „საქართველოს ვირტუოზები“.
საერთაშორისო ფესტივალი „ღამის სერენადები“, რომელიც მსოფლიოში სახელგანთქმულმა მევიოლინემ და დირიჟორმა ლიანა ისაკაძემ 1982 წელს დააარსა საქართველოს უმშვენიერეს მხარეში – აფხაზეთში, ჩვენი ქვეყნის ყველაზე ხანგრძლივი ისტორიის მქონე ტრადიციული ფესტივალია. 1991 წელს განვითარებული მოვლენების გამო ფესტივალმა დროებით არსებობა შეწყვიტა და 2002 წელს, აღდგა „ხელოვნების ზეიმის“ სახელით ქალაქ ბორჯომში, ხოლო 2009 წლიდან დაუბრუნდა შავიზღვისპირეთს, გადაინაცვლა ულამაზეს ქალაქ ბათუმში ისევ „ღამის სერენადების“ სახელით. 2023 წლიდან საფესტივალო ქალაქებს დაემატა ბორჯომი. წელს ფესტივალი აღდგენიდან მეთექვსმეტედ ჩატარდება და მას ლიანა ისაკაძის სახელი მიენიჭა.
