აჭარის მთავრობის თავმჯდომარე დღეს, ქობულეთში, მედიის გარეშე, ერთ ოჯახში იმყოფებოდა, სადაც თორნიკე რიჟვაძემ გაზქურა აანთო.
მთავრობის მიერ გავრცელებულ ინფორმაციაში დაკონკრეტებული არაა თუ რამდენ ოჯახს შეუყვანეს არჩევნებამდე ერთი დღით ადრე ბუნებრივი აირი.
ინფორმაცია სოციალურ ქსელში ქობულეთის მერმაც განათავსა, რომელსაც ერთ-ერთმა მოქალაქემ ასეთი შინაარსის კომენტარი დაუწერა:
“მე შოკში ვარ, და ალბათ თქვენ სრულ აგონიაში. ცენტრალური გზიდან, ჩემს სახლთან მისვლამდე, სრულიად ყველა მილი განადგურებულია, არა თუ დაზიანებული და სრულიად ლეღვაში კატასტროფული მდგომარეობაა. გაზი? სად აინთო? ეგ ოჯახი მაინტერესებს პირველ რიგში სადაც გაზი აინთო. ასეთი სპეკტაკლები წინა წლებშიც გვინახავს. ბატონი რიჟვაძე რომ ამოვიდა და გაზი აანთო, არჩევნების წინ, რამდენიმე საათით ადრე, 5 წელია რომ ვყვირით, მოგვხედეთ-თქო, ახლა გავახსენდით? სხვა პრობლემებს თუ გადახედა. აი, ბატონი ცოტნეს ნახვაც გამიკვირდა, კაი, იმ თავმჯდომარეს შეიძლება უმალავენ ამ ყველაფერს, მაგრამ ლეღვაში დაბადებულ და გაზრდილ კაცს როგორ გაუბედეს ეს მარაზმი, ვერ ვხვდები… თუმცა, აღარ მიკვირს… მე მხოლოდ ის მაინტერესებს, ამ განადგურებული მილების აღდგენა როდის მოასწარით, უკვე გაზი რომ გაიყვანეთ,” – წერს ნიგო ცეზარიშვილი, რომელიც სოფელ ლეღვაში ცხოვრობს.
“აჭარა თაიმსმა” გაარკვია, რომ ლეღვაში ბუნებრივი აირის გარეშე ბევრი ოჯახია. ჩვენ ათამდე, სხვადასხვა ტერიტორიაზე მცხოვრებს ვესაუბრეთ, ისინი ამბობენ, რომ მათი დასახლება გაზიფიცირების გარეშეა.
გავარკვიეთ, რომ ოჯახს, ვისთანაც დღეს თორნიკე რიჟვაძე იმყოფებოდა გაზი, მილით, მეორე სოფლიდან მიუყვანეს. ფაქტს გვიდასტურებენ თალიკო დუმბაძეც.
“ვერ გეტყვით რამდენ ოჯახში შევიდა გაზი. ვიცი, რომ ეტაპობრივად ამონტაჟებენ მილებს. ჩვენი სახლი სოფელ ჯიხანჯურის მილებზე დააერთეს. ლეღვაში, რამდენიმე წლის წინ დამონტაჟებული მილები დაჟანგულია, ბუნებრივ აირს აპარებდა და ახლა აკეთებენ. საკმაოდ დიდი სოფელია ჩვენი, ვიცი რომ ყველგან არაა გაზი. სოციალურად დაუცველებს მონტაჟს იანვარში შეპირდნენ,” – თქვა “აჭარა თაიმსთან” საუბრისას თალიკო დუმბაძემ.
ინფორმაციისთვის: ქობულეთის სოფლების მოსახლეობა გაზიფიცირებას წლებია უშედეგოდ ელოდება. გასულ არჩევნებზე “ოცნების” დაპირება დღემდე შეუსრულებელია.
პროექტი, რიგ სოფლებში ხარვეებით შესრულდა, რის გამოც მილები დაზიანებული და კოროზირებულია. ფაქტებზე ოპოზიციამ პროკურატურას მიმართა.
”აჭარა თაიმსი” თემაზე მუშაობას აგრძელებს. ვრცელ ინფორმაციას მოგვიანებით შემოგთავაზებთ.
