88 მომხრე და არცერთი წინააღმდეგი – მწვავე პროსტესტის ფონზე, “ქართული ოცნების” თვითგამოცხადებულმა პარლამენტმა საკუთარი ლეგიტიმაცია ცნო.
მე-11 მოწვევის პარლამენტის სხდომას მხოლოდ მმართველი გუნდის დეპუტატები, მათივე მინისტრები და საპატრიარქოს წარმომადგენლები ესწრებიან.
დროებითმა სამანდატო კომისიამ 150-ვე დეპუტატის უფლებამოსილება ცნო, მათ შორის, ბარიერგადალახული ოპოზიციონერების, რომლებიც კენჭისყრის გაყალბებულ შედეგებს ქუჩიდან აპროტესტებენ.
არაკონსტიტუციური პარლამენტის თავმჯდომარედ შალვა პაპუაშვილი დაამტკიცეს. მისი მოადგილეები კი გია ვოლსკი, თეა წულუკიანი და ნინო წილოსანი იქნებიან.
“პარლამენტი მოუსმენს ყველას, მაგრამ იმოქმედებს მხოლოდ ქართველი ხალხის ეროვნული საქართველოს ინტერესების შესაბამისად“, – თქვა პაპუაშვილმა.
დღევანდელ სხდომაზე დამტკიცდა ისიც, რომ საპარლამენტო კომიტეტები 11 წევრით იქნება წარმოდგენილი, საიდანაც შვიდი წევრი უმრავლესობას ეყოლება, ოთხი კი ოპოზიციას.
ეს უკანასკნელნი კი 2024 წლის საპარლამენტო არჩევნების შედეგებს არ აღიარებენ და ამ ეტაპზე პარლამენტში შესვლას არ აპირებს.
სხდომის პარალელურად, აქციის მონაწილეებმა საკანონმდებლო ორგანოს შენობას კვერცხები ესროლეს. ამ ფორმით, შეკრებილებმა არჩევნების შედეგები გააპროტესტეს.
ისინი საყვირებითა და სხვადასხვა შეძახილებით, პარლამენტში მყოფი დეპუტატებისთვის ხმის მიწვდენას ცდილობენ.
ადგილზე იმყოფებიან შინაგან საქმეთა სამინისტროს თანამშრომლებიც, რომლებიც პროტესტის მონაწილეებს პარლამენტის უკანა შესასვლელთან მიახლოების საშუალებას არ აძლევენ.
დღევანდელ სხდომას გამოეხმაურა საქართველოს პრეზიდენტი. სალომე ზურაბიშვილის შეფასებით, დღეს საქართველოში „შავი ორშაბათია“.
„შავი ორშაბათი“ საქართველოში: პოლიცია და სპეცრაზმი იცავენ კარს, რომლის მიღმაც „ქართული ოცნების“ მონები კლავენ ჩვენს კონსტიტუციას და დასცინიან ჩვენს პარლამენტს“, – წერს პრეზიდენტი.
