არაკონსტიტუციურმა აჭარის უმაღლესმა საბჭომ 2025 წლის ბიუჯეტი დაამტკიცა, რომელსაც მხარი 13-მა წევრმა დაუჭირა. თვითგამოცხადებულმა დეპუტატებმა, სავარაუდოდ, რეგიონის მთავარი ფინანსური დოკუმენტი კრიტიკისა და განხილვების გარეშე დაამტკიცეს.
როგორც წარმომადგენლობითი ორგანოს საზოგადოებასთან ურთიერთობის სამსახური ვებგვერდზე გამოქვეყნებულ ინფორმაციაში წერს მომავალი წლის ბიუჯეტი 880 100 000 ლარს შეადგენს. რიგგარეშე პლენარული სხდომის შესახებ ანონსი ამავე ვებგვერდზე გამოქვეყნდა, რის გამოც მედიასაშუალებების უმრავლესობას ინფორმაცია არ გააჩნდა.
საზოგადოებასთან ურთიერთობის სამსახურში გვარწმუნებენ, რომ სხდომის შესახებ მედიისთვის იმ ფორმით ინფორმაცია არ მიუწოდებიათ, როგორც აქამდე აკეთებდნენ. კერძოდ, საბჭო, დღემდე, სხდომებისა და ბიუროების შესახებ ჟურნალისტებს ერთიანი ჩატის მეშვეობით აწვდიდა ანონსებს.
რიგგარეშე სხდომას, რომელზეც თვითგამოცხადებული დეპუტატები ფინანსურს დოკუმენტს განიხილავდნენ ორი მედიასაშუალების, აჭარის მაუწყებელისა და TV25-ის წარმომადგენლები ესწრებოდნენ, რომლებიც ამ მოწვევის უმაღლეს საბჭოს, თავიანთ პუბლიკაციებში არაკონსტიტუციურად არ მოიხსენიებენ.
ინფორმაციისთვის: უსკოს მონაცემებით, არჩევნებში მონაწილე 11 საარჩევნო სუბიექტიდან, კანონმდებლობით დადგენილი 5%-იანი ბარიერი მხოლოდ 5-მა პარტიამ გადალახა. მათგან ყველაზე მეტი – 13 მანდატი „ქართულმა ოცნებამ“ მიიღო, 4 მანდატი აქვს – „ნაციონალურ მოძრაობას“, 2 – „გახარია საქართველოსთვის“, 1-1 კი “კოალიცია ცვლილებისთვის’’ და ,,ლელო საქართველოსთვის”. გაყალბებული არჩევნების მიზეზით, უმაღლეს საბჭოში ოპოზიცია არ შევიდა.
